Հայաստանը Եվրոպայի խորհրդի անդամ պետություններից ավելի շատ աջակցության կարիք ունի. ԵԽԽՎ դիտորդները` Հայաստան կատարած այցից հետո

Եվրոպայի խորհրդի խորհրդարանական վեհաժողովի (ԵԽԽՎ)՝ Հայաստանի պարտավորությունների կատարման մոնիթորինգի գծով համազեկուցողներ Կիմմո Կիլյունենը (Ֆինլանդիա, SOC) և Բորիանա Աբերգը (Շվեդիա, EPP/CD) կոչ են արել Եվրոպայի խորհրդի անդամ պետություններին աջակցել Հայաստանին, քանի որ վերջինս բախվում է «հսկայական մարտահրավերների»՝ կապված Լեռնային Ղարաբաղից ժամանած փախստականների հետ՝ միևնույն ժամանակ նպաստելով ժողովրդավարական բարեփոխումների զարգացմանը: Այս մասին հաղորդագրություն է տարածել Երևանում Եվրոպայի խորհրդի գրասենյակը:

«Ավարտելով 2023 թվականի նոյեմբերի 6-ից 8-ը Երևան կատարած այցը՝ համազեկուցողները նշել են, որ Լեռնային Ղարաբաղի 106 000 հայերը, ովքեր փախել են Ադրբեջանի ռազմական հարձակումից՝ ինը ամիս տևած մեկուսացումից տուժելուց հետո, որի արդյունքում ստեղծվել էր պարենամթերքի և հիմնական պաշարների խիստ պակաս, պատշաճ կացարան են գտել Հայաստանում և շտապ օգնություն են ստացել՝ շնորհիվ Հայաստանի իշխանությունների գործողությունների և բնակչության համերաշխության: «Սակայն այս աջակցության կայունությունն ապահովելու համար և Հայաստանում մշտական բնակություն հաստատելու ցանկություն ունեցողներին օգնելու համար երկրին շտապ անհրաժեշտ է բոլոր եվրոպացիների համերաշխությունը»,- ասել են համազեկուցողները։

«Չնայած այս ծայրահեղ ծանր հանգամանքներին, մենք ականատես ենք եղել ժողովրդավարական բարեփոխումներ իրականացնելու Հայաստանի շարունակական հանձնառությանը: Ընտրական կարգավորումները բարեփոխվել են Եվրոպայի խորհրդի չափանիշներին համահունչ, կազմակերպվել են մի քանի ընտրություններ՝ համապետական կամ տեղական մակարդակով, առանց դրանց արդյունքների վիճարկման։ Միջազգային փորձագիտական կառույցների բազմաթիվ առաջարկություններ իրագործվել են, իսկ մյուսները քննարկման փուլում են»,- նշել են համազեկուցողները։

«Վերջին տարիների ընթացքում Վենետիկի հանձնաժողովի հետ սերտ համագործակցությամբ բազմաթիվ բարեփոխումներ են իրականացվել՝ դատական համակարգի նկատմամբ հանրության վստահությունը բարելավելու նպատակով, և այժմ դատավորների, դատախազների և քննիչների բարեվարքության ստուգումներ են իրականացվում: Այնուամենայնիվ, կարգապահական վարույթները դեռևս դժգոհություն են առաջացնում, և քաղաքական դրդապատճառներով որոշումների մասին պնդումները խաթարում են դրա օրինականությունը: Այս մտահոգություններից մի քանիսը վերացնելու համար Վենետիկի հանձնաժողովին է ներկայացվել բարեփոխումների նախագիծ»,- ասել են նրանք:

«Կոռուպցիայի դեմ պայքարը կառավարության համար առաջնահերթություն է, և այս առումով նա մի քանի կարևոր քայլ է ձեռնարկել։ Վերջին երեք տարիների ընթացքում երկու նոր մարմին է ստեղծվել՝ ուժեղ մանդատով և իրական լիազորություններով, ստեղծվել են հակակոռուպցիոն հատուկ դատարաններ։ Այնուամենայնիվ, կոռուպցիան շարունակում է մնալ հանրային դժգոհության հիմնական պատճառը և այս ուղղությամբ շարունակական ջանքեր են պահանջվում»,- եզրափակել են նրանք:

Համազեկուցողները քննարկել են նաև ոստիկանության կողմից ուժի չափից ավելի կիրառման և քաղաքական հակառակորդների դեմ ուղղված անօրինական վարույթների մասին պնդումները և հաստատել են, որ կհետևեն այս հարցերի շուրջ զարգացումներին:

Հայաստանում գտնվելու ընթացքում համազեկուցողներն այցելել են Երասխ, որը գտնվում է Նախիջևանի հետ սահմանին, և հանդիպել Լեռնային Ղարաբաղից վերջերս տեղահանված ընտանիքների հետ, ովքեր վերաբնակվել են Արտաշատում և Երևանում»,- ասված է հաղորդագրությունում։