Նարեկը 4-5 տարի է` հետապնդումների մեջ է, երբ ուզեր, կգնար Հայաստանից, նա չի գնալու, Նարեկի տեսակն այնպիսին է, որ նա երբեք չի գնալու, չեն կարող ստիպել, որ գնա. Աթանեսյան

Բռնության կոչի մասին հոդվածը մուտք էր գործել նախկին քրեական օրենսգիրք 2020 թվականին, և Նարեկ Մալյանն այդ հոդվածն  անվանում է իր անվան հոդված: Այս մասին այսօր դատարանի դիմաց, լրագրողների հետ զրույցում ասաց քաղբանտարկյալ Նարեկ Մալյանի փաստաբան Տիգրան Աթանեսյանը: 

«Սորոսականները ՔՊ-ականների հետ միասին որոշեցին ստեղծել մի քրեական նորմ, որպեսզի Նարեկի նման մարդկանց փորձեն լռեցնել: Մենք ականատես ենք դասական քաղաքական հետապնդման, խայտառակություն է իրավաբանության տեսակետից, պարզապես հաշվեհարդար է, գործող իշխանությունը, քանի որ հասկանում է, որ գործել է ազգային դավաճանություն և բերել է մեզ ազգային աղետի, բոլոր կարմիր գծերը անցած` ի՞նչ պետք է անի` պետք է լռեցնի բոլորին, որպեսզի փորձի զսպել արդարացի զայրույթը և այս գործը դրա վառ ապացույցն է»,- ասաց փաստաբանը: 

Ինչ վերաբերում է ՔՕ-ում գտեղ գտած նորմին, ապա Աթանեսյանն այն որակեց խայտառակություն. «Ասում է,օրինակ, բռնության կոչ` կապված մի խումբ անձանց քաղաքական և այլ հայացքների հետ: Սա ի՞նչ է նշանակում, որ, օրինակ, «Գորշ գայլերի» կողմնակիցները պաշտպանվում են այդ հոդվածով, պեդոֆիլները, եթե ակումբ ունենան, պաշտպանվում են այդ հոդվածով: Այսինքն` սորոսական երազանք է` ստոր հատկություններով մարդկանց պետք է պաշտպանես, որպեսզի իրենց թույնը տարածեն հասարակության մեջ: Այդ խմբերը պաշտպանվում են օրենքով, ու դու չես կարող նրանց քննադատել: Դա աննորմալություն է: Խումբը պետք է լինի իրավաչափ, խմբի շահերը պետք է լինեն իրավաչափ, ընդունելի և բարոյական, որպեսզի նոր պաշտպանվեն»,- ընդգծեց փաստաբանը: 

Խոսելով հենց Նարեկ Մալյանի մասին, ապա Աթանեսյանը նշեց, որ Մալյանը խոսքն ուղղում է ՔՊ-ականներին, բայց ոչ թե որպես կուսակցություն:

«Ի՞նչ է նշանակում ՔՊ. ոչ թե այն պատճառով, որ մարդիկ ինչ-որ կուսակցության անդամ են, այլ այն պատճառով, որ այդ կուսակցությունը, լինելով իշխանություն` հանձնել է Արցախը, սպանդի է տարել հայորդիներին, բերել է ազգային աղետ, պետականության կորստի վտանգ, այսինքն` սա է նրանց խմբային շահը, և Նարեկի քննադատական խոսքն ուղղված է դրան: Ընդունենք, որ եթե սա է իրենց շահը, իսկ դա այդպես է, ի՞նչ քննադատական խոսք, բացի վիրավորանքից, հայհոյանքից, և արդարացված բռնությունից, ոչինչ չի հասնում նման տիպի մարդկանց: Այսինքն` խոսքը չի վերաբերում ՔՊ-ի ծրագրում գրվածին, որ 2050 թվին մենք ֆուտբոլի աշխարհի չեմպիոն ենք դառնալու և Նարեկը դրան է դեմ, դեմ է այն ամեն ինչին, ինչին մենք բոլորս ականատես ենք: Այսինքն` խոսքն ուղղված է դրանց, իրենք մեկնաբանում են ինչպես ուզում են, և ունենք այն, ինչ ունենք: Մարդուն կալանավորել են` կալանքի որևէ հիմք չունենալով, քրեական հետապնդումը` մի կողմ, ինչո՞ւ են կալանավորել: Նարեկը 4-5 տարի է` հետապնդումների մեջ է, երբ ուզեր, կգնար Հայաստանից, նա չի գնալու, Նարեկի տեսակն այնպիսին է, որ նա երբեք չի գնալու, չեն կարող ստիպել, որ նա գնա»,- նկատեց նա: 

Փաստաբանը հիմարություն համարեց հայտարարությունը, թե Նարեկ Մալյանը կարող է կրկնել «հանցանքը», իսկ նման հայտարարություններ անողին անվանեց փարիսեցի և սրիկա: