Շատ դեպքերում ՀԱՊԿ-ի հետ հարաբերությունների վատթարացումը կախված եղել է ՀՀ իշխանություններից. Սեյրան Օհանյան

ՀԱՊԿ-ն այն կազմակերպությունն է, որը ձևավորվել է Խորհրդային միության փլուզումից հետո և նրա ձևավորման ակունքներում կանգնած է եղել նաև Հայաստանի Հանրապետությունը: Պարզ է, որ հարաբերությունների մեջ կան խնդիրներ, բայց ստեղծվել է պայմանագրաիրավագրային փաթեթ և մանավանդ ռազմական կոմպոնենտի մեջ Հայաստանի Հանրապետությունը մեծ ներգրավվածություն է ունեցել դրանց զարգացման հարցում: Այս մասին այսօր Ազգային ժողովում լրագրողների հետ զրույցում ասաց ԱԺ «Հայաստան» խմբակցության ղեկավար Սեյրան Օհանյանը: 

«Այս պարագայում, երբ Հայաստանի Հանրապետությունն ու Արցախը գտնվում են բավականին լուրջ, բարդ ռազմաքաղաքական իրավիճակում, և սպառնալիքները խորանում են, չգնալ ՀԱՊԿ-ի միջոցառումներին, նշանակում է ևս մեկ վտանգի տակ դնել մեր տարածաշրջանը և Հայաստանի Հանրապետության անվտանգությունը: Մենք այդ դաշինքի անդամ ենք, մենք այդ դաշինքի շրջանակներում պետք է ձևավորենք մեր հարաբերությունները: Շատ դեպքերում հարաբերությունների վատթարացումը կախված եղել է ՀՀ իշխանություններից»,- ասաց Օհանյանը` բերելով ՀԱՊԿ գլխավոր քարտուղարի նկատմամբ իրականացված քրեական հետապնդման, զորավարժություններին չմասնակցելու օրինակները: 

Ըստ Պաշտպանության նախկին նախարարի` Հայաստանի Հանրապետությունը բոլոր այն կառույցներում, որտեղ մասնակցություն ունի, հատկապես ռազմաքաղաքական այդ դաշինքում` ՀԱՊԿ-ում, բոլոր միջոցառումներին պիտի գնա մասնակցի և եթե խնդիրներ ունի իր հարևանների կամ դաշինքի անդամ երկրների հետ, ապա այդ հարցերը պետք է բարձրաձայնել այն հարթակներում, որտեղ որ միջոցառումներ են իրականացվում: 

Լրագրողի հարցին` գնանք այնտեղ ի՞նչ անենք, եթե անվտանգային հարցերում այդ կառույցը մեզ չի աջակցում, Օհանյանը պատասխանեց. «Եթե կազմակերպությունը պարտականությունը չի կատարում, և որոշակի խնդիրներ մենք էլ ենք տեսնում, այդ ամենի մասին պետք է բարձրաձայնել, բայց ես գտնում եմ, որ ՀԱՊԿ վրա որոշ դեպքերում այնպիսի խնդիրներ են դրվում, կամ ասվում, որ իրենք պետք է գան դա անեն, որի իրականացնողը ՀՀ-ն է: Ես ապրում եմ այս երկրում և ՀԱՊԿ-ի ոչ մի երկիր չի գալու ամրապնդի մեր սահմանները, ՀԱՊԿ ոչ մի երկիր չի գալու մեր սահմաններում, մեր բարձունքներում մեր ռազմավարական կետերում մեզ համար խրամատներ փորի: ՀԱՊԿ-ի խնդիրն ավելի գլոբալ է` տարածաշրջանային խոշոր բախումների ընթացքում»: