Երևանում բախվել են Honda Fit-ն ու Նոր Նորքի թաղապետին սպասարկող Toyota-ն. «խլինքի» մասին գրառումով հայտնի թաղապետը դեմքի, բերանի և քթի հատվածում ստացել է վնասվածքներ, ինչից սկսվել է արյունահոսություն (ֆոտո)

Նոյեմբերի 12-ին Երևանում՝ Հերացի փողոցում, տեղի ունեցած ավտովթարի հետևանքով դեմքի մասում թեթև մարմնական վնասվածքներ է ստացել Երևանի Նոր Նորք վարչական շրջանի ղեկավար Տիգրան Տեր-Մարգարյանը: Այս մասին հայտնում է Shamshyan.com-ը: 

Ժամը 17:00-ի սահմաններում Հերացի փողոցում բախվել են Երևանի բնակիչներ 26-ամյա Գագիկ Սարգսյանի վարած Toyota Corolla մակնիշի և 47-ամյա Տիգրան Ազոյանի վարած Honda Fit մակնիշի ավտոմեքենաները: Վթարի հետևանքով, ըստ նախնական տեղեկությունների, տուժածներ չեն եղել, սակայն Toyota-ի ուղևոր Տիգրան Տեր-Մարգարյանը, ով Երևան քաղաքի Նոր Նորք վարչական շրջանի ղեկավարն է, դեմքի մասում՝ քթի և բերանի հատվածում ստացել է մարմնական վնասվածք և սկսվել է արյունահոսություն, սակայն թաղապետը հրաժարվել է հիվանդանոց մեկնելուց՝ գերադասելով բուժումը ստանալ տան պայմաններում: 

Վթարի փաստով ՊԾ Երևան քաղաքի գնդում փաստաթղթեր են ձևակերպվում: Վարորդները ենթարկվել են սթափության փորձաքննության, եղել են սթափ:

Կայքի տեղեկություններով՝ Toyota Corolla-ն հաշվառված է Երևանի քաղաքապետարանի հաշվեկշռում և սպասարկում է Նոր Նորքի թաղապետին: 

Հիշեցնենք, որ Տեր-Մարգարյանը հայտնի դարձավ «խլինք»-ի մասին գրառումով. այն «նվիրված» էր Հայկ Մարությանի մամուլի խոսնակ Հակոբ Կարապետյանին. «Էն մամուլի խոսնակին ասեք, որ խլինքը չի կարա խնչի»,- գրել էր Տեր-Մարգարյանը։