Մեծ Բրիտանիայի նախկին վարչապետ Դեյվիդ Քեմերոնը նշանակվել է ԱԳ նախարար

Մեծ Բրիտանիայի նախկին վարչապետ Դեյվիդ Քեմերոնը նշանակվել է Արտաքին գործերի նախարար։ Այս մասին հայտնում է РБК-ն։

Նշվում է, որ նոյեմբերի 13-ին վարչապետ Ռիշի Սունակը վերադասավորումներ է սկսել Մեծ Բրիտանիայի կառավարությունում՝ պաշտոնանկ անելով Ներքին գործերի նախարար Սուելլա Բրավերմանին։ Նրա փոխարեն նշանակվել է Ջեյմս Քլեվերլին, ով նախկինում եղել է ԱԳՆ ղեկավար։

Արդեն այսօր առավոտյան Դեյվիդ Քեմերոնին նկատել են Դաունինգ սթրիթում գտնվող վարչապետի նստավայր մտնելիս։

Մեծ Բրիտանիայի վարչապետի գրասենյակը «X» սոցիալական ցանցում հաստատել է նաև նախարարների կաբինետի նախկին ղեկավարի նշանակումն ԱԳՆ ղեկավարի պաշտոնում։

Հիշեցնենք, որ Դեյվիդ Քեմերոնը կառավարությունը ղեկավարել է 2010-2016 թվականներին։ Խորհրդարանական ընտրություններում նրա հաղթանակից հետո կառավարությունը սկսել է իրականացնել խնայողության ծրագիր։ 2013-2014 թվականներին նա հավանություն է տվել միասեռ ամուսնությունների օրինականացմանը։ 2014 թվականին դարձել է Ռուսաստանի արտաքին քաղաքականության բուռն քննադատներից մեկը։ 2016 թվականին հանդես է եկել ԵՄ-ին Մեծ Բրիտանիայի անդամակցության հարցով հանրաքվե անցկացնելու օգտին՝ ցանկանալով պահպանել երկրի ներկայությունը այս կազմակերպությունում: Նույն թվականին նա թողել է իր պաշտոնը և նրան հաջորդել է Մեծ Բրիտանիայի ներքին գործերի նախարար Թերեզա Մեյը։