Ադրբեջանի և Հայաստանի միջև միջնորդության համար կարևոր է երկու կողմերի վստահությունը․ Ղարիբաշվիլի

Ադրբեջանի և Հայաստանի միջև վրացական միջնորդության հաջող նախադեպ կա: Ինչպես գրում է APA գործակալությունը, այս մասին Վրաստանի վարչապետ Իրակլի Ղարիբաշվիլին հայտարարել է Փարիզի խաղաղության ֆորումում՝ իր հայ գործընկեր Նիկոլ Փաշինյանի հետ համատեղ պանելային քննարկման ժամանակ։

«Երկու տարի առաջ մենք հաջողությամբ հանդես եկանք որպես միջնորդ Ադրբեջանի և Հայաստանի միջև: Սա միջնորդության առաջին նախադեպն էր, որ ստեղծեցինք Նիկոլ Փաշինյանի և Ադրբեջանի նախագահ Իլհամ Ալիևի հետ։ Ադրբեջանը Վրաստանի միջնորդությամբ ազատ է արձակել 15 ձերբակալվածների, իսկ Երևանը տրամադրել է ականապատ տարածքների քարտեզ։ Ուստի Վրաստանը կարողանում է հասնել արդյունքների»,- ասել է Ղարիբաշվիլին։

Վրաստանի վարչապետի խոսքով՝ ընդգծել է, որ Ադրբեջանի և Հայաստանի միջև միջնորդը պետք է լինի մի երկիր, որին վստահում են երկու կողմերը։

«Կարծում եմ՝ վստահությունն այստեղ կարևոր է։ Որովհետեւ եթե ինչ-որ մեկը միջնորդություն է առաջարկում, պետք է վստահություն լինի այդ միջնորդի նկատմամբ երկու կողմից։ Եթե ​​վստահություն չլինի, միջնորդությունը չի հաջողվի։ Եվ մեկ այլ խնդիր. ես այս տարվա սկզբին արդեն խոսել եմ Դավոսում այս մասին։ Գուցե կողմերը միմյանց չեն վստահում, բայց համագործակցություն պետք է լինի։ Առանց համագործակցության, քննարկումների և խաղաղ երկխոսության խաղաղություն չի լինի»,- ասել է Ղարիբաշվիլին։