Սափրված և հնազանդ. դատավորներին դարձնում են ենթակա անձ, չինովնիկներ, որոնք հաշվետու են վերադասին. Սափրված և հնազանդ. «Հրապարակ»

«Հրապարակ» թերթը գրում է.

«Օրերս հայտնի դարձավ, որ Բարձրագույն դատական խորհուրդը շրջանառության մեջ է դրել դատավորների ներքին աշխատանքային կարգապահական կանոններ, որոնց մի մասը վերաբերում է նրան, թե դատավորն ինչ տեսքով պետք է ներկայանա դատարան։ Ըստ նախագծի՝ տղամարդ դատավորները պետք է սափրված կամ դեմքի խնամված մազածածկույթով ներկայանան աշխատանքի։

Մեր տեղեկություններով՝ այս աղմկահարույց նախագիծը հեղինակել են ԲԴԽ նախագահ Կարեն Անդրեասյանը և Երևանի ընդհանուր իրավասության քրեական դատարանի նախագահ Մնացական Մարտիրոսյանը՝ Մացոն, իշխանությունների սրտի դատավորը։ Դատավորների կարգապահական նոր վարքականոնով իրականում Անդրեասյանն ու Մնացական Մարտիրոսյանը նպատակ ունեն «կոնտրոլի» տակ պահել դատավորներին, լծակ ունենալ նրանց նկատմամբ։ Փաստաթղթով կարգավորվում են ոչ միայն դատավորների արտաքին տեսքի, այլ նաև աշխատանքային կարգապահությանն առնչվող, դատարանի գույքը պահպանելու, դատավորների միջև ծառայողական փոխհարաբերությունների և այլ հարցեր։

ԲԴԽ-ի մշակած այս վարքականոնները պարտադիր են դատավորների համար։ Դիցուք, որևէ դատավոր այդ կանոնագրքի ընդունումից հետո աշխատավայրից շուտ դուրս գալու դեպքում պարտադիր պետք է գրավոր տեղյակ պահի դատարանի նախագահին, ուշանալու դեպքում պատճառները ներկայացնի։ Այսինքն՝ դատավորներին դարձնում են ենթակա անձ, չինովնիկներ, որոնք հաշվետու են վերադասին, մինչդեռ մինչ օրս նրանք ինքնուրույն անձ են եղել, և իրենք են որոշել՝ ինչ հագնել, երբ գալ ու գնալ աշխատանքի»։

Մանրամասները թերթի այսօրվա համարում