«Հայաստան» դաշինքի անդամները մանդատներից հրաժարվել են անմիջապես Ռոբերտ Քոչարյանի ճնշման ներքո․ մանրամասներ

Երկար ծանր ու թեթև անելուց հետո, Ազգային ժողովի «Հայաստան» խմբակցության պատգամավոր Արմեն Չարչյանը վայր դրեց պատգամավորական մանդատը։

Նրա մանդատը վայր դնելուց հետո «Հայաստան» դաշինքի ընտրական ցուցակի հաջորդ երեք թեկնածուներ Միհրդատ Մադաթյանը, Անժելա Նալբանդյանը և Գերասիմ Վարդանյանն ինքնաբացարկի դիմումներ են ներկայացրել Կենտրոնական ընտրական հանձնաժողով՝ հրաժարվելով պատգամավորի մանդատից։ 

Ու ստացվեց այնպես, որ մանդատը վերցրեց ցուցակում ընդգրկված հաջորդ թեկնածուն՝ Լևոն Քոչարյանը, նույն ինքը՝ ՀՀ երկրորդ նախագահ Ռոբերտ Քոչարյանի որդին։

Այս մասին խոսելիս, իր հարցազրույցում նույն խմբակցության պատգամավոր Գեղամ Նազարյանը լեզվի սայթաքում է արել, թե՝

 «․․․ մանդատից հրաժարվեցին՝ ապօրինաբար կալանքի տակ գտնվող իրենց ընկերոջն աջակցություն հայտնելու համար: Իրենք գտան, որ Լևոն Քոչարյանի՝ ԱԺ-ում լինելն ավելի ճիշտ է, քան՝ իրենց»:

Իհարկե, նրա այս վրիպակը հեռու չէ իրականությունից այնքանով, որ թեկնածուներն իսկապես մանդատից հրաժարվել են՝ այն փոխանցելով Լևոն Քոչարյանին, սակայն, տարբերությունն այն է, որ նրանք ոչ թե մեծահոգաբար, այլ ստիպողաբար են այն զիջել։

NEWSPRESS.am-ի տեղեկություններով` կրտսեր Քոչարյանի գործերը շտկելու և նրան անձեռնմխելի դարձնելու գործով անձամբ նրա հայրն է զբաղվել։ Ինչպես մեր աղբյուրներն են հայտնում, թեկնածուները մանդատներից հրաժարվել են Ռոբերտ Քոչարյանի ճնշման ներքո։

Թեկնածուներից, օրինակ, «Հայաստան» դաշինքի անդամ, հոգեբան Միհրդատ Մադաթյանը հայտարարել էր, որ վերցնելու է պատգամավորական մանդատը։ Նա այս մասին խոսելիս՝ մասնավորապես ասել էր․

«Այսօր մի առաքելություն կա, որն անում ենք` այս իշխանություններին հեռացնելն է։ Ես ևս այդ օրակարգով եմ գալիս խորհրդարան»․․․

Միամիտ պետք է լինել մտածելու համար, թե նա հոժարակամ է հրաժարվել մանդատից։

Մանդատը հարկավոր էր նաև ՀՅԴ ներկայացուցիչ ու դաշինքի անդամ Գերասիմ Վարդանյանին, ով իսկապես պայքարող տեսակ է ու նույնպես անձեռնմխելիության խնդիր ունի։

Հիշեցնենք` Գերասիմ Վարդանյանին բերման էին ենթարկել և կալանավորել 2020 թ. նոյեմբերի 9-ի հայտարարության ստորագրմանը հաջորդած ակցիաների ժամանակ։ Գերասիմ Վարդանյանը կալանավորվել էր 2021-ի մայիսի 12-ին: Նա ազատ է արձակվել: Կիրառվել է 10 միլիոն դրամ գրավ:

Ինչևէ, Լևոն Քոչարյանի` պատգամավոր դառնալուց մեկ քայլ է մնացել պակաս։ Իսկ ինչ վերաբերում է այն լուրերին, թե իբր ՔՊ-ականները քննարկում են Լևոն Քոչարյանին անձեռնմխելիությունից զրկելու հարցը, ապա, ըստ մեզ հասած տեղեկությունների, «Քաղաքացիական պայմանագրի» ներսում նման հարց դրված չէ։

Մեր աղբյուրի փոխանցմամբ` այս տեղեկությունը դաշտ է նետվել հենց քոչարյանական թևի ներկայացուցիչների կողմից, որպեսզի տպավորություն չստեղծվի, թե՝ Լևոն Քոչարյանը հեշտ ու հանգիստ «եկավ, տեսավ, հաղթեց․․․»։

Բացի այդ, Լևոն Քոչարյանի մանդատի հետ կապված հարցը որոշ գործընկերների մոտ ևս հարցեր է առաջացրել։ Այս պարագայում ՔՊ-ի կողմից Լևոնին անձեռնմխելիությունից զրկելու հարցը կարող է մեղմել նրանց վրդովմունքը, քանի որ ճնշմամբ մանդատից հրաժարվելու երևույթն իսկապես վիրավորական է գործընկերների նկատմամբ։

Դասականը կասեր՝ սիրուն չի, Ռոբերտ:

Արմինե Մկրտումյան