ՄԻՊ թեկնածուների ցուցակով ոչնչացվեց ՄԻՊ ինստիտուտը

Մարդու իրավունքների նախկին պաշտպան Կարեն Անդրեասյանի հրաժարականից հետո առաջին «կարևոր» հարցի` «ինչու»-ի պատասխանը, շատ թե քիչ պարզաբանելուց հետո, «շերեփներն սկսկեցին երկարել դեպի ապուրով լի կաթսան»: Ասել է թե` ի հայտ եկան պաշտպանի նոր թեկնածուներ, և սկսեցին շրջանառվել հավանական ու անհավանական անուններ:

Այսօր արդեն պատկերն ավելի պարզ է. ունենք 3 հստակ թեկնածու:

Հատկանշական է, որ մարդու իրավունքերի պաշտպանի պաշտոնը պահանջում է, հեղինակություն վայելող, հասարակական ու քաղաքացիական կազմակերպությունների հետ աշխատանքի փորձ ունեցող անձնավորություն:

Իսկ ովքե՞ր են մեր ապագա պաշտպանները, որքանով է ճանաչում նրանց հանրությունը:
«Հեղինակության» առումով առաջին հորիզոնականում «Ժառանգության» Զարուհի Փոստանջյանն է: Նա թերևս օմբուդսմենի լավագույն օրինակը չէ, քանի որ այս պաշտոնում նշանակվելուց հետո` այն ամբողջությամբ կքաղաքականացնի: Միակ առավելությունը մյուս երկու թեկնածուների նկատմամբ այն է, որ իր քաղաքական դիրքորոշումներով ու կեցվածքով ձեռք է բերել հանրային ճանաչում և, ըստ էության, ԱԺ-ում ստանձնել է «օմբուդսմենի» դերը:

Երկրորդ տեղը զբաղեցնում է Հանրապետական կուսակցության կողմից առաջադրված Արման Թաթոյանը:
Այս թեկնածուի մոտ թեև բացակայում է օմբուդսմենի պաշտոնի համար կարևոր հեղինակությունը, բայց բոլորը վստահ են, որ օմբուդսմենի պաշտոնը կստանձնի հենց իշխող կուսացության թեկնածուն:

Հարկ է նկատել, որ Արման Թաթոյանի թեկնածու առաջադրվելուց հետո միայն շատերն իրենց համար բացահայտեցին, որ նա արդարադատության փոխնախարար է: Դա մի կողմից, մյուս կողմից էլ ավելորդ է հերթական անգամ փաստել, որ Հանրապետականը, ասել է թե իշխանությունը, որևէ կերպ չի առնչվում մարդու իրավունքների պաշտպանության հետ, և որևէ անգամ չի ստնաձնել մարդու պաշտպանի դերը:

Ավելին` Հայաստանի քաղաքացիների իրավունքները միշտ ոտնահարվել են հենց իշխանության կողմից:

Հետաքրքիր է, հանրապետական թեկնածուն այս պարագայում ումի՞ց և ինչպե՞ս պետք է պատշպանի քաղաքացու իրավունքերը: Իր իսկ կուսակցությունի՞ց… ինչևէ:

Երրորդի մասին կարելի է ընդհանրապես լռել, բայց անաչառության սկզբունքով` ներկայացնենք նրան ևս. ԱԺ ԲՀԿ խմբակցության պատգամավոր, Տիգրան Ուրիխանյանի ղեկավարած «Ալյանս» կուսակցության անդամ`Նարեկ Ալոյան: Ո՞վ է նա, հազիվ թե ճանաչողներ լինեն. թե ինչ է արել հանրության համար` պատասխանը միանշական է` ոչինչ:

Վերջ, այսքանով սահմանափակվեց ՄԻՊ թեկածուների ցուցակը` սահմանափակելով ՄԻՊ ինստիտուտի գործունեությունը ու ոչնչացնելով այն հիմնովին: