Համալիրի վաճառքի մութ ու լույս կողմերը

Կառավարության վաղվա նիստին քննարկվելու է նախագիծ, որով առաջարկվում է չեղյալ ճանաչել «Կարեն Դեմիրճյանի անվան մարզահամերգային համալիր» պետական ոչ առևտրային կազմակերպությունը լուծարելու մասին» որոշումը: Այսինքն «ՆՏԱԱ Ինվեստմենտ Գրուպ» ՍՊԸ-ի և ՊՆ-ի միջև կնքված պայամանագիրը չեղյալ է համարվելու: Կառավարության հիմնավորմամբ՝ ընկերությունը օտարված պետական սեփականություն հանդիսացող գույքի դիմաց վճարումները սահմանված ժամկետում չի իրականացրել:

Հիշեցնենք, որ մարզահամերգայինը վաճառվել էր 30 մլն ԱՄՆ դոլար գումարով: Կառավարությունը վաճառքի ժամանակ թմբկահարում էր, որ ներդրումային մեծ ծրագիր է, չորս տարվա ընթացքում ստեղծվելու են հյուրանոցներ, փակ ջրաշխարհ, համերգային դահլիճներ, հանդիպումների սրահներ, ռեստորաններ, խանութներ, ինչպես նաև ապահովվելու 250 նոր աշխատատեղ: Ավելի քան 100 մլն ԱՄՆ դոլար ներդրումների ախորաժակ էր բացվել, բայց փաստն այն է, որ արդեն յոթերորդ անգամ կառավարությանը չի հաջողվում վաճառել համալիրը: Ինչպես ժողովուրդը կասեր ՝ «ոմանց ախորժակին քացախ»:

Newspress.am-ի հետ զրույցում Երևանի ավագանու «Բարև Երևան» խմբակցության անդամ Անահիտ Բախշյանն ասաց, որ այսպիսով ապացուցվում է, թե կառավարությունը ինչ-որ հեռատես քայլեր է իրականացնում. «կարող է լավ լինի» սկզբունքով աշխատելը ոչնչի չի հանգեցնում`մանրամասնեց Ա. Բախշյանը: Նա նաև հիշեցրեց, որ համալիրը վաճառվել էր մի անձի, ով ԱՄՆ-ում գողության համար հետախուզման մեջ էր:

«Վաճառքի ժամանակ ես ստատուս էի գրել՝ գողը գողից գողացավ, Աստված տեսավ զարմացավ, ինչպես կառավարությունն է ետ ողորմեա անում իր որոշումը, այնպես էլ ես ետ ողորմեա եմ անում ասածներս» -շեշտեց ավագանու անդամը:

Բախշյանի խոսքով՝ հետաքրքիր կլինի հետևել, թե նույն ոգևորված դեմքով են վաճառքը չեղյալ համարելու, ինչպիսի դեմքով գործարքի մասին էին հայտարարել. «պիտի ասեն՝ ժողովուրդ ջան ձեզ խոստացված աշխատատեղերը չեղան, ներդրումները չեղան, պիտի ասեն, որ հեռատես չեն»:

Անահիտ Բախշյանը նաև ընդգծեց, որ հաշվի առելով այն, թե ինչ արագությամբ և գաղտնիությամբ շենքը օտարվեց, վաճառվեց, պարզ է դառնում այն, որ համալիրի հետ վերադարձումը նշանակում է այն, որ ոմանք կզրկվեն ատկատի հնարավորությունից: