Օօօօֆֆֆ, ես այդ մասին չգիտեմ. մարզպետը` իր պաշտոնանկման մասին

Կառավարությունում պաշտոնանկություններ են սպասվում. Խնդիրը քննարկվելու է այսօր ՀՀԿ ԳՄ նիստում: Ի թիվս այլ պաշտոնանկությունների, ավելի քան հստակ խոսակցություններ են պտտվում, որ իր պաշտոնին հրաժեշտ կտա Արագածոտնի մարզպետ Սարգիս Սահակյանը:

Newspress.am-ին Արագածոտնի մարզպետ Սարգիս Սահակյանը իր պաշտոնանկության վերաբերյալ պատասխանեց, որ տեղյակ չէ, թե պաշտոնանկ է լինելու և որևէ տեղեկություն չունի այդ մասին, անգամ տեղյակ չէր, որ այսօր ՀՀԿ ԳՄ նիստում հնարավոր քննարկման է դրվելու նաև իր պաշտոնանկության մասին հարցը: Արագածոտնի մարզում իր կատարած աշխատանքը որևէ կերպ չգնահատեց, ոչ էլ տեղյակ է, թե ինչ աշխատանքի է անցնելու:

Մենք Արագածոտնի մարզպետ Սարգիս Սահակյանից հետաքրքրվեցինք, այնուամենայնիվ, եթե ինքը պաշտոնանկ արվի` ինչ է լինելու Ծաղկահովիտ համայնքի բնակիչ Սարդարյանների բնակարանի հարցը, ովքեր վերջերս գնացել էին մարզպետարան և նստադուլ արել մարզպետի աշխատասենյակի մոտ: Ընտանիքը համարվում է անապահով, ընտանիքում հաշմանդամություն ունեցող երեխա կա, սակայն համայնքում կառուցված շենքից անապահով ընտանիքը բնակարան չէր ստացել:

«Ինչքան անապահով մարդ կա, որ բնակարան է հասնում, բայց ապրում են վագոն-տնակներում»,- ասաց նա, հավելելով, որ բնակարան են ստացել նրանք, ովքեր դրա կարիքը ունեին: Արդյոք Սարդարյանները բնակարանի կարիք չունեի՞ն հարցին, պատասխանեց. «Կառավարության որոշումներով նախատեսված է, թե ինչ կատեգորիայի մարդիկ պետք է ընդգրկվեին այդ ծրագրում, նրանք այդ կատեգորիայի մեջ չէին մտնում»:
Սարդարյանները չէին մտնում կառավարության սահմանած կատեգորիայի մեջ, դրա համար էլ չե՞ն ստացել հարցին, հետևեց դեռևս մարզպետի Օօօօօֆֆֆ-ը ու հարցազրույցն ավարտվեց: