Կրթության զարգացման գործընկերների հետ քննարկվել են ԱՀ-ից բռնի տեղահանված երեխաների կարիքները

ՀՀ կրթության, գիտության, մշակույթի և սպորտի նախարարության և ՄԱԿ-ի Մանկական հիմնադրամի (ՅՈՒՆԻՍԵՖ) հայաստանյան գրասենյակի համատեղ նախաձեռնությամբ նոյեմբերի 3-ին կազմակերպվել է «Մարդասիրական արձագանք Լեռնային Ղարաբաղից բռնի տեղահանված երեխաների և երիտասարդների կրթության կարիքներին» խորագիրը կրող հանդիպում՝ կրթության ոլորտի զարգացման գործընկերների մասնակցությամբ:

ՀՀ ԿԳՄՍ նախարար Ժաննա Անդրեասյանը ողջունել է մասնակիցներին և շնորհակալություն հայտնել քննարկմանը միանալու պատրաստակամության համար: Ժաննա Անդրեասյանը վստահություն է հայտնել՝ համատեղ ջանքերով հնարավոր կլինի նպաստել երեխաների և երիտասարդների կրթության շարունակականության ապահովմանն ու որակյալ կրթության մատչելիությանը:

«Կրթության ոլորտի զարգացման բոլոր գործընկերների հետ ունենք բազմաթիվ հաջողված նախաձեռնություններ, որոնք իրականացվում են կրթության տարբեր մակարդակներում և ուղղություններով: Վստահ եմ՝ նույն արդյունավետությամբ կշարունակենք աշխատել այս դժվարին իրավիճակում, երբ խոսում ենք 30 հազարից ավելի երեխաների կրթության իրավունքի և դրա ապահովման հարցերի մասին, որոնցից շուրջ 21 հազարը՝ դպրոցահասակ: Այս պահին ՀՀ մարզերի և Երևանի դպրոցներում ընդգրկվել են Լեռնային Ղարաբաղից բռնի տեղահանված շուրջ 17 հազար երեխաներ: Մեր առաջնային խնդիրն է՝ նախևառաջ ապահովել այս պահին դեռևս դպրոցական կրթության մեջ չներառված երեխաների ընդգրկումը դպրոց»,- ասել է Ժաննա Անդրեասյանը՝ ընդգծելով, որ սա, հավանաբար, կապված է մեր հայրենակիցների՝ բնակության վայրի հարցում դեռևս վերջնական որոշակիություն չունենալու հետ:

«Մեկ բան ակնհայտ է՝ անկախ բոլոր փոխկապակցված խնդիրների ապահովումից՝ հնարավորինս շուտ պետք է այնպես անել, որ բոլոր երեխաներն ընդգրկվեն կրթության համակարգում: Կարծում եմ՝ այս առումով բոլորիս հետևողական և համատեղ աշխատանքն այսօր պետք է կարևոր առաջնահերթություն դիտենք»,- նշել է ԿԳՄՍ նախարարը:

Կրթության ոլորտի զարգացման գործընկերների հետ հանդիպմանը Ժաննա Անդրեասյանը կարևորել է երեխաների կարիքների գնահատումը, նրանց համար իրականացվող հոգեբանական աջակցության ծրագրերը, ինչպես նաև անդրադարձել ուսուցիչների վերապատրաստման ծրագրերի կարևորությանը:

Նշվում է, որ, նախարարի խոսքով, գերատեսչության աշխատանքների առանձին ուղղություններից է ուսանողներին տրվող աջակցությունը: Նա հիշեցրել է՝ Կառավարությունն իրականացնում է կրթության ընդհատված իրավունքի վերականգնմանն ուղղված աջակցության ծրագրեր թե՛ բարձրագույն ուսումնական հաստատություններում, թե՛ քոլեջներում և ուսումնարաններում սովորող ուսանողների համար: Այս նպատակով մեկնարկել է կրթաթոշակային ծրագիր, որով հնարավոր է իրականացնել ուսման վարձի փոխհատուցում, սակայն կա արցախցի ուսանողների մի խումբ, որոնք  Հայաստանի բուհերում ուսանող են եղել բռնի տեղահանությունից առաջ:

«Նրանք այս ժամանակահատվածում չեն տեղափոխվել Հայաստան և չեն ունեցել կրթության ընդհատման խնդիր, բայց բռնի տեղահանման հետևանքով անհնար է դարձել նրանց կրթության հետագա ֆինանսավորումը: Եթե նախկինում այս ուսանողների ծնողները կամ ԼՂ կառավարությունը հոգում էին նրանց կրթության ֆինանսավորման հարցը, ապա այս պահին դա օբյեկտիվորեն հնարավոր չէ»,- ներկայացրել է Ժաննա Անդրեասյանը:

Այս համատեքստում ԿԳՄՍ նախարարն առաջարկել է դիտարկել միջազգային գործընկերների կողմից իրականացվող ծրագրերում այս խմբի ուսանողների համար կրթաթոշակ սահմանելու հնարավորությունը:

«Այս պահին նրանք պետական կրթաթոշակային ծրագրի շահառու չեն, և եթե կա ուսման շարունակության հետ կապված ֆինանսական աջակցության խնդիր, ապա կարծում եմ՝ այս հարցը կարող է լինել մեր համատեղ քննարկման օրակարգում»,- ընդգծել է Ժաննա Անդրեասյանը:

ԿԳՄՍ նախարարը կարևորել է՝ առանձին գործընկերների կողմից իրականացվող նախաձեռնությունները կլրացնեն պետության որդեգրած քաղաքականությունն ու համահունչ կլինեն պետության որդեգրած սկզբունքներին: Ժաննա Անդրեասյանը կարևորել է նաև այն հանգամանքը, որ համատեղ աշխատանքները լինեն համակարգված և չկրկնեն մեկը մյուսին:

«Ռեսուրսները սահմանափակ են, իսկ խնդիրները՝ շատ: Հայտնում եմ մեր պատրաստակամությունը՝ գործընկերային և թափանցիկ միջավայրում ձեզ հետ միասին աշխատելու: Պատրաստ ենք նպաստել բոլոր այն ծրագրերին, որոնք ուղղված կլինեն այս խնդիրների լուծմանը»,- եզրափակել է Ժաննա Անդրեասյանը:

Ըստ աղբյուրի՝ Հայաստանում ՅՈՒՆԻՍԵՖ-ի ներկայացուցիչ Քրիսթինե Վայգանդը, ողջունելով ներկաներին, ընդգծել է հասանելի կրթության կարևորությունը երեխաների զարգացման գործում և պատրաստակամություն հայտնել աջակցելու ԼՂ-ից բռնի տեղահանված երեխաների ու երիտասարդների կրթության ապահովման գործընթացում առաջացած խնդիրների արագ արձագանքմանն ու լուծմանը:

ԿԳՄՍ նախարարի տեղակալ Արթուր Մարտիրոսյանը կարևորել է կրթության ոլորտի զարգացման գործընկերների հետ նմանօրինակ հանդիպումների անցկացումը և ընդգծել՝ քննարկումները կլինեն շարունակական՝ հասցեական աջակցության և ծրագրերի արդյունավետ կազմակերպման նպատակով:

Հանդիպման ընթացքում կրթության զարգացման ոլորտի գործընկեր կազմակերպությունների ներկայացուցիչները ներկայացրել են իրենց կողմից իրականացվող աջակցության ծրագրերի մանրամասները, վերհանել մի շարք խնդիրներ՝ կապված, մասնավորապես, ԼՂ-ից բռնի տեղահանված երեխաների ինտեգրման հետ՝ պատրաստակամություն հայտնելով իրականացնել աջակցման տարատեսակ ծրագրեր: