Հայրը պնդում է՝ Երևանի թիվ 17 հատուկ դպրոցի տնօրեն Վերգինե Եսայանը` Բագրատ Եսայանի կինը, չարաշահել է դիրքն ու կաշառքի դիմաց արգելել իրեն տեսակցել որդու հետ

«Երևանի հենաշարժական համակարգի խախտումներ ունեցող երեխաների թիվ 17 հատուկ դպրոցի» տնօրեն Վերգինե Եսայանը չարաշահում է իր դիրքն ու մանկավարժին անհարիր գործողություններ ծավալում։ Այս մասին ահազանգով NEWSPRESS.am-ի խմբագրություն է դիմել հոլանդաբնակ Շանթ Վարդանյանը, ով իր որդու հետ տուժել է Վերգինե Եսայանի` իր պնդմամբ, անօրինական գործողություններից։

Շանթ Վարդանյանը մեզ հետ զրույցում պատմեց, որ 2016 թվականին ամուսնալուծվել է, սակայն շարունակել է հոգ տանել որդու նկատմամբ ու հաճախակի հանդիպումներ է ունեցել նրա հետ։ 2020 թվականին, տեղափոխվելով Հայաստան, նրա կինը որդուն տարել է Վերգինե Եսայանի տնօրինության տակ գործող թիվ 17 հատուկ դպրոց, քանի որ երեխան հենաշարժողական որոշակի սահմանափակումներ ունի։

Այդ շրջանում, իմանալով, որ ամուսինը պատրաստվում է ամուսնանալ, Շանթ Վարդանյանի կինը հրաժարվել է նախկին ամուսնուն ընդունելուց ու անգամ թույլ չի տվել նրան տեսակցել որդուն։

Ավելին, ամուսնու խոսքով, կինը ներքին պայմանավորվածության է եկել տնօրեն Վերգինե Եսայանի հետ, որպեսզի նա թույլ չտա իր նախկին ամուսնուն հանդիպել որդու հետ։ 

«Ես գիտեմ, թե ինչի դիմաց է տիկին Եսայանը համաձայնել ու ինչու ինձ թույլ չի տվել տեսակցել որդուս, ում հետ իմ հարաբերություններն իդեալական են եղել միշտ»,- ասում է Շանթ Վարդանյանը, ով վստահեցնում է, որ իր «նախկին կինը կաշառել է Վերգինե Եսայանին»։

Վերջինս Շանթ Վարդանյանից պահանջել է դիմում գրել՝ որդու հետ տեսակցելու համար։ Իսկ երբ դիմումը ներկայացրել է՝ Վերգինե Եսայանը մերժել է` նշելով, որ այնտեղ պետք է բառ փոխվի։ Շանթ Վարդանյանը գրել է երկրորդ դիմումը՝ արդեն Վերգինե Եսայանի պահանջած ձևով, սակայն այս անգամ ևս նա մերժել է։ Շանթ Վարդանյանն այս անգամ դիմում գրել է ԿԳՄՍ նախարարին, ինչն այնքան էլ դուր չի եկել Վերգինե Եսայանին։

Շանթ Վարդանյանը պատմում է, որ անգամ իր մասին հերյուրանքներ են տարածել, թե հոգեկան խնդիրներ ունի, սակայն դատաբժշկական փորձաքննությունը պարզել է, որ Վարդանյանը ոչ մի տիպի շեղում չունի։

Դատավորը երեխայի մորից պահանջել է դատական նիստին բերել որդուն, որպեսզի կարողանան զրուցել նրա հետ, սակայն մայրը հրաժարվել է։ Իսկ երբ մի քանի նիստից հետո այդպես էլ երեխան ներկա չի գտնվել պրոցեսին՝ մոր կամայականության պատճառով, դատավորն ինքն է ստիպված եղել հանդիպել երեխայի հետ: 

Այստեղ հատկանշական է, որ Վերգինե Եսայանն անգամ դատավորին թույլ չի տվել հանդիպել երեխայի հետ ու վիճաբանել է նրա հետ։ Միայն դատավորի օրինական ու համառ պահանջից հետո է նա տեղի տվել։ Դատավորը երեխայի հետ զրույցում պարզել է, որ նա հավասարաչափ սիրում է ծնողներին և շատ է ուզում տեսնել հորը:

Երեխայի հետ տեսակցելուց հետո, դատարանը որոշում է կայացրել, որ հայրն անարգել կարող է տեսակցել իր որդու հետ, քանի որ երեխան սպասում ու սիրում է հորը, սակայն անգամ դատարանի այս վճռից հետո էլ Եսայան Վերգինեն թույլ չի տվել հորը տեսակցել։

Ավելին, երբ Շանթ Վարդանյանը մոտեցել է դպրոցին, Եսայանի հրահանգով, նրան է մոտեցել ուսումնական հաստատության պահնորդը և գոռալով պահանջել հեռանալ։

Երբ Շանթ Վարդանյանն ասել է, որ իրեն թույլատրված է և ինքը հակաօրինական ոչինչ չի անում, պահնորդը հարվածել է նրա ձեռքին ու գցել հեռախոսը։ Բացի այդ, նա փորձել է սադրել Վարդանյանին՝ կանչելով նրան դպրոցի հետնամաս, հավանաբար, հաշվեհարդար տեսնելու համար։

տեսանյութ.

Եվ այս ամենն արվել է մի մարդու նկատմամբ, ում երեխան, շատ ուրիշ երեխաների հետ միասին, գուցե այդ պահին պատուհանից նայելիս է եղել ու տեսել, թե ինչ է անում ծնողի հետ դպրոցի աշխատակազմը։

Այլ կերպ ասած` Վերգինե Եսայանը, անտեսելով իր իսկ ղեկավարած դպրոցի սաների հոգեվիճակն ու ապրումները, ինչ-ինչ պատճառներով ու ինչ-որ բանի դիմաց, շարժվել է ծնողի թելադրանքով, դարձել նրա կամակատարն ու դրանով խաթարել, առանց այն էլ սահմանափակ հնարավորություններ ունեցող երեխայի հոգեկան աշխարհը։ Եսայանն իրեն թույլ է տվել մտնել ընտանիքի անձնական կյանք, ինչպես ասում են՝ մտնելով մատի և մատանու արանքը և անհանգստություն պատճառելով երեխային։

Մինչդեռ, եթե թերթում ենք Վերգինե Եսայանի սոցիալական էջերն ու փորձում ծանոթանալ նրա կենսագրությանը, ապա այնտեղ միայն հանդիպում ենք նրա պայծառ երանգներով ու գույներով ներկայացված կենսագրությանը․ հոգեբան ու ներառական կրթության մասնագետ։

Իհարկե, այս ու դպրոցում հանդիպող էլի մի շարք այլ պատմությունները՝ կապված Վերգինե Եսայանի կամայականությունների հետ (որոնց կանդրադառնանք մեր հաջորդ հրապարակումներում) թերևս հազիվ մեզ համոզեն, որ Եսայանն իսկապես հոգեբան է, կամ մասնագետ՝ ներառական կրթության ոլորտում։

Շանթ Վարդանյանը վստահ է՝ Վերգինե Եսայանն այդ ամենն արել է գումարի դիմաց։

«Այն գումարը, որ Եսայանն իմ նախկին կնոջից վերցրել է՝ ոսկորի նման կանգնել է կոկորդին ու թույլ չի տալիս խնդրին ավելի արդար ու սթափ նայել»,- ասում է Վարդանյանը մեզ հետ զրույցում ու նկատում, որ այսօրինակ վարքագիծը կարող է իր բացասական հետքը թողնել երեխաների ճակատագրի վրա։

Արդեն մոտ 3 տարի հայր ու որդի զրկված են իրար տեսակցելու հնարավորությունից, որի մեջ ակնհայտ է նաև դպրոցի, իսկ մասնավորապես` հենց տնօրեն Վերգինե Եսայանի մեղավորությունը։

Մեր զրուցակցի խոսքով, Վերգինե Եսայանը, միջամտելով այսօրինակ խնդիրներին, ավելի է բարդացնում իրավիճակն ու երեխաների համար ավելի մեծ խնդիրներ է ստեղծում։

«Հասկանում եք, այդ երեխաներն Աստծո կողմից տրված են, որ նրանք արդեն որոշակի խնդիրներ ու դժվարություններ ունեն, իրենց պետք է զգույշ մոտենալ, որպեսզի ավելի չցավեցնեն, նոր խնդիրներ չստեղծեն, իսկ նման դեպքերում այդ երեխաները հայտնվում են ավելի մեծ խոչընդոտների առաջ»,- ասում է Շանթ Վարդանյանը։

Նրա որդին այլևս այդ դպրոց չի հաճախում, բայց Վարդանյանն ուզում է իրազեկել ու զգուշացնել մյուսներին, որպեսզի նրանք ևս չհայտնվեն իր կարգավիճակում ու խուսափեն հնարավոր այն բոլոր խնդիրներից, որոնց հանդիպել են ինքն ու իր որդին՝ Վերգինե Եսայանի ոչ մասնագիտական մոտեցման պատճառով։

Այս տարի Շանթ Վարդանյանի նախկին կինը երեխային այլ դպրոց է տարել։ Շանթ Վարդանյանը հույս ունի, որ գոնե այս դպրոցի մանկավարժներն ավելի մասնագիտորեն կմոտենան խնդրին ու, ի վերջո, տևական ընդմիջումից հետո, վերջապես կկարողանա շփվել որդու հետ։

Ինչ վերաբերում է «Երևանի հենաշարժական համակարգի խախտումներ ունեցող երեխաների թիվ 17 հատուկ դպրոցի» տնօրեն Վերգինե Եսայանի կողմից իրականացված նման այլ միջադեպերին ու այն ամենին, թե ինչի վրա են ծախսվում այդ դպրոցին հատկացված ֆինանսավորումները, ապա NEWSPRESS.am-ը դրանց կանդրադառնա հաջորդիվ:

Զրուցեց՝ Արմինե Մկրտումյանը