ԿԳՄՍ փոխնախարարն ասաց, թե ինչու են երաշխավորել առանց Արցախի ու պատմությունը խեղաթյուրող քարտեզով դասագրքի գործածությունը

Բոլոր այն դասագրքերը, որոնք այս տարի հրատարակվել են և դրվել են գործածության՝ ժամանակավոր դասագրքեր են։ Այս մասին կառավարության նիստից հետո, լրագրողների հետ զրույցում ասաց ԿԳՄՍ փոխնախարար Արաքսյա Սվաճյանը՝ անդրադառնալով լրագրողի հարցին, թե՝ ինչպես նա կվերաբերվեր, եթե իր երեխան սովորեր 7-րդ դասարանի համար նախատեսված Հայոց պատմության դասագրքով։ 

Փոխնախարարի խոսքով` ուսումնական տարվա ընթացքում հավաքագրվելու են այն բոլոր թերությունները, որոնք առկա են դասագրքերում, որպեսզի հետագայում դրանք գործածությունից դուրս բերվեն, կատարեն շտկումներ ու հրատարակեն նոր դասագրքեր։ Նա ընդգծեց, որ խոսքը վերաբերում է նաև Հայոց պատմության դասագրքին։

«Պատմության դասագրքում միգուցե մի քիչ խնդիրներ կան, բայց այդ խնդիրները հետագայում խմբագրման ենթակա են, բայց այստեղ խնդիրը նաև չափորոշիչների հարց է։ Նույն, երկար քննարկված քարտեզի հարցը՝ Տիգրան Մեծի ժամանակաշրջանի քարտեզի վրա տեղայնացված է նաև ժամանակակից քարտեզը, որպեսզի աշակերտը, որն ուսումնասիրում է Տիգրան Մեծի ժամանակաշրջանի երկրների քարտեզը, կարողանա նաև պատկերացում կազմել, թե տվյալ երկրի տարածքում ներկայումս որ երկիրն է գտնվում»,- ասաց փոխնախարարը։

Նա խուսափեց պատասխանել լրագրողի հարցին, թե ինչու Արցախն այդ քարտեզում չկա։

«Այդ հարցը կարող եք ուղղել հեղինակներին»,- արձագանքեց նա։

Ճշտող հարցին, թե գիրքը չի՞ անցել փորձաքննություն՝ գործածության դրվելուց առաջ, փոխնախարարը պատասխանեց, թե համապատասխան փորձաքննություն անցել է, որին ներկա են եղել մասնագետներ, դպրոցների ուսուցիչներ, հոգեբաններ, մեթոդիստներ և այլ մասնագետներ, ովքեր տվել են իրենց դրական եզրակացությունը, ինչի հիման վրա էլ նախարարի հրամանով երաշխավորվել է։

Փոխնախարարն այդպես էլ չանդրադարձավ հարցին, թե այդ դեպքում ինչո՞ւ է նախարարը երաշխավորել պատմությունը խեղաթյուրող քարտեզով դասագրքի գործածությունը։