Հովիկ Աբրահամյանն անշեղորեն իրականացնում է «Կովի պտուկից` բիոզուգարան 2» օպերացիան

Ամեն ինչ Հովիկ Աբրահամյանի համար շատ վատ ստացվեց: Ու այդ վատը սկսվեց դեռ նախորդ տարվա դեկտեմբերից, երբ վարչապետի վրա դրվեց Սահմանադրական հանրաքվեն «հորով-մորով» անելու պատասխանատվությունը: Բայց պարզվում է` Հովիկ Աբրահամյանը, եվրոպացիների լեզվով ասած, տնային աշխատանքը լավ չի կատարել, ինչն էլ փաստացի, սահմանափակել է Ընտրական օրենսգրքի մանևրելու դաշտն իշխանության համար: Ինչպես ասում են, ավելի լավ է զբաղվել արտադասարանային աշխատանքով:

Նորից նույն չարաբաստիկ դեկտեմբեր ամսին Հովիկ Աբրահամյանը որոշեց նախ ձեռքը խփել սեղանին, ասելով` բյուջեն խեղճ է, ոչ մի ավելորդ ծախս, մյուս կողմից ծառայողական մեքենաների գնման համար նույն Հովիկ Աբրահամյանի ձեռամբ 1մլն 650.000 ԱՄՆ դոլար հատկացվեց: Նախ թարմացվեց Հովիկ Աբրահամյանի հովանավորյալ Արփինե Հովհաննիսյանի ղեկավարած գերատեսչության ավտոպարկը: Նոր ավտոմեքենաներ մտան նաև ԴԱՀԿ-ը, որպեսզի այս կառույցը թանկարժեք մեքենաներով ավելի ազդեցիկ երևա ու մարդկանց նոր թափով գցի իր ծուղակը: Մեքենաների համալրում են ստացել նաև այլ գերատեսչություններ, օրինակ ԿԳՆ, բայց Աշոտյանը կբավարավի միայն այդ ավտոմեքենաների հետ սելֆի անել ու այն հանձնել դաշնակներին: Ինչևէ, խնդիրն այն է, որ երկրի աղքատության այս ֆոնին կիսագաղտնի պայմաններում հսկայական գումարներ են ծախսվում, որ չինովնիկները, յուրայինները վայելեն ու երկրի պարտքն ավելացնեն:

Չարաբաստիկ դեկտեմբերից հետո Հովիկ Աբրահամյանը որոշեց ստեղծել հակակոռուպցիոն խորհուրդ, բայց այս դեպքում էլ Հովիկ Աբրահամյանի համար վատ ստացվեց: Փաստացի ԱՄՆ-ից ստանում ենք 850.000 ԱՄՆ դոլար կոռուպցիայի դեմ պայքարելու համար, բայց նույն ամերիկյան պաշտոնյաները, միջազգային կառույցները ահազանգում են` Հայաստանում կոռուպցիան ավելի է խորացել: Այս փաստն ընդհուպ առաջացրել է ամերիկյան դաշնային բյուրոյի զայրույթն ու դժգոհությունը: Բայց, ինչպես ասում են, Հովիկ Աբրահամյանն անդրդվելի է: Հիմա էլ որոշել է վարկ վերցնել ճանապարհաշինության համար: Տարին դեռ չի սկսվել, բայց արդեն արտաքին պարտքը ավելացել է մոտ 160 մլն դոլարով: Մի տեսակ տպավորություն է, թե Հովիկ Աբրահամյանն աշխատում է մի սկզբունքով` ինձնից հետո թեկուզ ջրհեղեղ և անշեղորեն իրականացնում է Տիգրան Սարգսյանի «Կովի պտուկից` բիոզուգարան 2» օպերացիան: