2023թ. բյուջեի կապիտալ ծախսերի կատարողականում 53%-ի թերկատարում է արձանագրվել. պատգամավոր

«Սեպտեմբերի 15-ի դրությամբ 2023թ. բյուջեի կապիտալ ծախսերի կատարողականը եղել է 47%: Այսինքն՝ 53%-ի թերկատարում է արձանագրվել և այդ ժամանակահատվածի համար նախատեված է եղել 411 մլրդ դրամի ծախս, որից կատարվել է ընդամենը 194 մլրդ դրամինը»։ Այս մասին ԱԺ-ում ասաց «Հայաստան» խմբակցության պատգամավոր Թադևոս Ավետիսյանը` դիմելով ֆինանսների նախարար Վահե Հովհաննիսյանին, ով ներկայացնում էր  2024թ. պետական բյուջեի նախագիծը։ 

Ընդդիմադիր պատգամավորի խոսքով՝ տնտեսական հարաբերությունների ոլորտում կապիտալ ծախսերի կատարողականը եղել է 36%:

Վահե Հովհաննիսյանն էլ հայտարարեց, թե 2023 թվականի կապիտալ ծախսերի կատարողականը շատ չի շեղվում նախորդ տարվա կատարողականի ցուցանիշներից:

Նրա խոսքով՝ չորրորդ եռամսյակում լինում է կապիտալ ծախսերի զգալի ավելացում, քանի որ տարվա ընթացքում շինարարական աշխատանքներ կատարվում են և կատարողական ակտերի ստորագրումից հետո նոր իրականացվում են վճարումներ:

«Այլ հարց է, որ այս ամենը պետք է ըստ եռամսյակի ճիշտ պլանավորվի, որպեսզի նման պատկեր ձեզ համար չառաջանա»,- հայտարարեց Վահե Հովհաննիսյանը։

Նա նաև նշեց, որ տնտեսական աճի ռիսկերը գնահատվում են և տարբեր սցենարների համար ապահովում են պահուստների բարձիկ, որպեսզի այդ ռիսկերը մեղմվեն։

Թադևոս Ավետիսյանը չհամաձայնեց նախարարի տեսակետին, թե չորրորդ եռամսյակին կառավարությունը կկարողանա այն ծավալի կապիտալ ծախսեր իրականացնել, որ այդ ամբողջ տարվա 64% թերկատարումը մի եռամսյակով գա լրանա կամ մոտենա 90%-ից ավելիին։

Պատգամավորի դիտարկմամբ, եթե անգամ այդպես էլ ստացվի, ապա առաջնայինը պետական բյուջեի ճիշտ պլանավորումն է:

«Դուք բերում, պետական բյուջեի նախագիծ եք ներկայացնում, ասում եք, թե բյուջեում կապիտալ ծախսերի այսքան ավելացում ենք նախատեսել, օրինակ՝ պաշտպանության, կրթության, ճանապարհաշինության ոլորտներում և այլն, բայց հետո ներկայացման ժամանակ չի խոսվում կատարողականի մասին»,- ասաց ընդդիմադիր պատգամավորը և հավելեց. «Երբ գալիս է կատարողականի քննարկումը, արդեն հաջորդ տարվա բյուջեն ընդունված է և ասում եք, որ այս տարի այդ նախատեսածը կանենք»:

Ավետիսյանի գնահատմամբ, ժամանակների նման խզումն ակնհայտ մանիպուլյացիաների տեղիք է տալիս, դրա համար շատ կարևոր է, որ երբ քննարկվում է բյուջեն, նաև այդ խնդիրներն առաջ քաշվեն։

«Պետք է ծրագրերով ռիսկերը թուլացվի և կանխարգելվի, ոչ թե պահուստից ծախսվի»,-հայտարարեց ընդդիմադիր պատգամավորը: