Տաքսիները ՏԿԱԻՆ-ի ծառայություններից հրաժարվում են

Նախօրեին Արմավիրի մարզում երևանյան տաքսի ծառայության տաքսիներից մեկը արգելափակվել էր ձյանի մեջ` կանչն իրականացնելուց հետո: Այնուհետև սեփական ուժերով փորձել էին տաքսին քաշել-հանել, տեղափոխել անվտանգ տարածք:

«Նման աշխատանքի համար մասնավոր ծառայությունը 30 հազար դրամ է պահանջում»,- newspress.am-ին պատմեց երևանյան տաքսի ծառայության տաքսիստը:

Դիտարկմանը, թե ինչու չեք դիմում 911 ծառայության օգնությանը, տաքսիստը պատասխանեց, որ երբ փրկարարներն իմանում են, որ տաքսի է, ապա կամ կանչը չեն սպասարկում, կամ օգնելուց բենզինի գումար են պահանջում` 10 000 դրամ:

Իրո՞ք այդպես է և 911 ծառայությունը տաքսի ծառայության մեքենաներին օգնելու համար նման վարվելակե՞րպ ունի հարցով Newspress.am-ը դիմեց ՀՀ տարածքային կառավարման և արտակարգ իրավիճակների նախարարության լրատվական ծառայությանը:

Ծառայությունից բացառեցին, որ փրկարարները օգնելու դիմաց գումար են պահանջում, կամ իմանալով, որ տաքսի է ահազանգողը` չեն սպասարկում:

«Փրկարարներն անգամ բնակիչների ահազանգից հետո սառցալեզվակներն են մաքրում, նրանք չեն կարող աշխատանքի դիմաց գումար պահանջել: Այդ տեղեկությունը մենք պաշտոնապես հերքում ենք»,- փոխանցեցին ՏԿԱԻՆ լրատվական ծառայությունից:

Նաև հիշեցրեցին, որ մարդկանց օգնելու համար անգամ վրանային հենակետեր են գործում և բացառվում է, որ փրկարարները կանչի դեպքում օգնության չհասնեն: