Ցինիզմ է, ուղղակի ցինիզմ․ Շարմազանովը՝ ԱՄՆ դեսպանի հայտարարության մասին

Եթե Հայաստանը ժողովրդավարության փարոս է, նշանակում է Նիկոլ Փաշինյանն էլ Պերիկլեսն է կամ Ջեֆերսոնը։ Լավ, չի կարելի էդքան ցինիկ լինել։ Այս մասին այսօր լրագրողների հետ զրույցում ասաց ՀՀԿ խոսնակ Էդուարդ Շարմազանովը՝ անդրադառնալով Հայաստանում ԱՄՆ դեսպան Քրիստինա Քվինի հայտարարությանը, թե «Հայաստանը ժողովրդավարության փարոս է»։

«Միացյալ նահանգների տիկին դեսպանի այդ հայտարարությունը, առանց վիրավորանքի, բայց քաղաքագիտության մեջ կա շատ լավ բացատրություն՝ ցինիզմ, ուղղակի ցինիզմ է։ Ո՞նց կարելի է, 15-ից ավելի քաղբանտարկյալ կա, դատարաններ շրջափակած, պառլամենտում ընդդիմադիրներին ծեծող, խոսքի ազատությունը ճնշող,  խաղաղ ցուցարարների նկատմամբ բռնի, անհամաչափ ուժ գործադրող, շինծու քրեական գործեր իրականացնող իշխանությունը ոնց կարող է ժողովրդավար լինել։ Սա ևս մեկ անգամ խոսում է դեսպանատան երկակի ստանդարտների մասին»,- հայտարարեց ԱԺ նախկին նախագահը։

Նա հիշեցրեց, որ այս իշխանությունը քաղաքացու վրա թքող իշխանություն է՝ նկատի ունենալով գործող ԱԺ նախագահի կողմից քաղաքացու դեմքին թքելու դեպքը։ 

«Քաղաքացու վրա թքող իշխանությունը, ընդդիմադիրներին բռունցքներով ծեծող իշխանությունը, լռեցնող, շինծու դատական գործեր սարքող, դատարաններ շրջափակող իշխանությունը դարձավ ժողովրդավա՞ր։ Եթե Նիկոլը ժողովրդավար ա, վաղն էլ նույն այդ դեսանատունը կարող ա Իլհամ Ալիևին «ժողովրդավարության հայր» կոչումը տալ»,- հեգնեց Շարմազանովը։ 

Լրագրողի դիտարկմանը, թե ինչպե՞ս է ստացվում, որ Միացյալ նահանգները ռազմական օգնություն է ցուցաբերում Ադրբեջանին, իսկ մեր հասցեին բավարարվում է միայն հայտարարություններով, շնորհավորանքներով, նա պատասխանեց, որ որքան էլ իշխանությունները հերքեն, միևնույն է 2018 թվականին տեղի ունեցած հեղաշրջումն ուներ աշխարհաքաղաքական հովանավորներ, որոնք եղել են հիմնականում Արևմուտքում և Թուրքիայում։ 

«Դրանց շահառուն՝ պարոն Բոլթոնը, եկել և Երևանում հայտարարել է, որ Հայաստանը պետք է հրաժարվի պատմական կաղապարներից։ Հավաքական Արևմուտքի և Թուրքիայի խնդիրն է Հայաստանը կտրել Ռուսաստանից, ռուսներին հեռացնել Հարավային Կովկասի տարածաշրջանից, Նիկոլ Փաշինյանն էլ հոժարակամ դարձել է բութ գործիք Արևմուտքի և Թուրքիայի համար։ Դա համար էլ, այսպես կոչված, միջազգային հանրությունն աչք է փակում։ Իսկ Արևմուտքը, եթե ժողովրդավարության հետ կապ ունենար, տեսնում եք էդ երկակի ստանդարտները՝ իսրայելական համակամտության և Ղարաբաղյան հակամարտության ժամանակ։ Ժողովրդավարություն-մողովրդավարություն չկա։ 44-օրյա պատերազմի ընթացքում ժողովրդավարություն տեսե՞լ եք։ 120 հազար հայ մարդ հայրենազրկվեց, բացի գեղեցիկ խոսքերից սրանք ի՞նչ են արել, հիմա էլ դրած հակառուսականությւոնը սարքել են հանրային տիրույթում խոսք»։