Մենք ունեցել ենք մի միջադեպ. Տիգրան Ավինյան

«Մի հատ կասե՞ք՝ ձեր ֆինանսավորման հարցը լուծվե՞ց, թե՞ նախորդ շաբաթ էլ չեղավ»։ Երևանի գործակարգավարական խորհրդակցության ժամանակ Երևանի մետրոպոլիտենի տնօրեն Բաբկեն Սեդրակյանին հարցրեց քաղաքապետ Տիգրան Ավինյանը:

Սեդրակյանը հայտնեց, որ նախորդ շաբաթ չի կարգավորվել, հույս ունեն, որ այս շաբաթ կլուծվի և, որ արդեն 8 ամիս է չեն կարողանում ֆինանսավորումը ստանալ:

«Մի հատ կներկայացե՞ք՝ ինչ խնդիր կա»,- հարցրեց Ավինյանը։

Արձագանքելով նրան՝ մետրոպոլիտենի տնօրենն ասաց. «Կոնկրետ մենք ներկայացրել ենք 32 անվազույգերի և 4 կմ ռելսերի գնման ֆինանսավորման համար, որից 400 մլն դրամը՝ անվազույգերին և  200 մլնը՝ ռելսերի համար, ինչը 4-5 անգամ ներկայացրել ենք, որ կառավարությունը հաստատի»:

Ավինյանը հետաքրքրվեց, թե որ նախարարությունների կողմից է դիտողությունը:

Բաբկեն Սեդրակյանը պատասխանեց, որ միայն Ֆինանսների նախարարության կողմից է եղել դիտողություն, իսկ խնդիրն այն է, որ այդ գումարը հաշվարկել էին 2024թ. բյուջեում:

«Հարգելի գործընկերներ, ես ուզում եմ բոլորիդ ուշադրությունն այստեղ սևեռել, որովհետև մենք ունեցել ենք մի միջադեպ մետրոպոլիտենում՝ բարեբախտաբար, առանց զոհերի: Պարոն Փամբուխչյան, խնդրում եմ աշխատեք, որպեսզի նախագիծը սեղմ ժամկետներում ընդունվի, քանի որ իրապես շատ վտանգավոր իրավիճակում  ենք գտնվում և բյուրոկրատական, այսպես ասած, անիմաստ ձգձգումները հավելյալ ռիսկեր են առաջացնում: Եթե հրատապության մասին է խոսքն՝ այս ծրագիրն ամենահրատապներից մեկն է ՀՀ-ում»,- հայտարարեց Տիգրան Ավինյանը: