Ադրբեջանն ունի հայաստանաբնակ բոլոր տարածքներն ամբողջությամբ նվաճելու պարտավորություն․ Լարիսա Ալավերդյան

Ալիևը ոչ միայն ժամանակ չունի, նա կարիք չունի հանդիպելու Հայաստանի Հանրապետության պաշտոնատար անձանց հետ, քանի որ Ադրբեջանի գործողությունների վրա հայաստանյան որևէ գործոն, անձ, հայտարարություն՝ բացարձակապես ոչ մի նշանակություն չունի ու չի ազդում: Այս մասին ասուլիսի ժամանակ ասաց նախկին օմբուդսմեն Լարիսա Ալավերդյանը՝ անդրադառնալով Ադրբեջանի նախագահ Իլհամ Ալիևի` Նիկոլ Փաշինյանի հետ նախանշված հանդիպման նպատակով Բրյուսել չմեկնելու առիթով Արարատ Միրզոյանի և Ալեն Սիմոնյանի մեկնաբանություններին:

Հիշեցնենք, որ Արարատ Միրզոյանն ասել էր, թե՝ Ալիևը Նիկոլ Փաշինյանի հետ հանդիպելու ժամանակ չունի, իսկ Ալեն Սիմոնյանն էլ ասել էր, թե Ալիևի համար դիսկոմֆորտ է:

Լարիսա Ալավերդյանը նկատում է, որ Ադրբեջանն ու Թուրքիան ունեն վաղուց կազմած ծրագիր: Նրա խոսքով` դրանց մասին բազմաթիվ անգամ է խոսվել։

«Այն, ինչ չեն ավարտել 1920-ականներին, ուզում են ավարտել մեր օրերում: Եթե հիշում եք, ընդգծել եմ, որ թուրքական քաղաքականությունը, ռազմավարությունը շատ երկարաշունչ է․ և՛ Թուրքիայի և՛ Ադրբեջանի համար կարճաժամկետ ծրագրերը կազմվում են ոչ թե երեք, այլ հարյուր տարվա համար: Եվ այդ ծրագրերն իրականացնելու առումով Ադրբեջանն անշեղորեն շարժվում է դեպի ամբողջական նվաճում ոչ միայն Արցախի: Ադրբեջանը, որպես Թուրքիայի կողմից ժամանակին ստեղծված պետություն, ունի հայաստանաբնակ բոլոր տարածքներն ամբողջությամբ նվաճելու պարտավորություն»,- ասաց Ալավերդյանը՝ հավելելով, որ այդ խնդիրը չի փոխվել անգամ սովետական ժամանակ:

Նրա դիտարկմամբ, զարմանալ, թե՝ Ալիևն ինչու չունի ժամանակ, լինի Գրանադա, կամ այսօր՝ Բրյուսել մեկնելու, բացարձակապես պետք չէ:

«Ալիևը ոչինչ չունի խոսելու և լսելու, որովհետև, ինչպես արդեն համոզվել ենք, դատելով արդյունքներից, Հայաստանի Հանրապետության գործող իշխանությունը նահանջողական փիլիսոփայության, այսպես ասած, «խաղաղության» օրակարգի ներքո ամբողջովին սպասարկում է թուրք-ադրբեջանական անթաքույց ցեղասպանական բոլոր ծրագրերը»,- եզրափակեց նախկին օմբուդսմենը: