«Վստահ եմ, որ ներքուստ մենք գիտենք դրդիչներին»․ Ալեն Սիմոնյանը՝ «հոկտեմբերի 27»-ի բացահայտման մասին

ԱԺ նախագահ Ալեն Սիմոնյանը նոր «հոկտեմբերի 27»-ի վտանգ է տեսնում։ Նա այդ մասին ասաց լրագրողների հետ զրույցում։

«Ես չեմ բացառում` այն էլ այս իրավիճակում»,- ասաց նա:

Թե ինչու 2018-ից ի վեր չի բացահայտվել «հոկտեմբերի 27»-ի գործը, Ալեն Սիմոնյանը նկատեց, որ բոլորը գիտեն դրա պատճառը։

«Վստահ եմ, որ ներքուստ մենք գիտենք դրդիչներին և հիմնական պատճառները, ովքեր են եղել, բայց ինձ իրավունք չեմ վերապահի դա բարձրաձայն ասել, իմ պաշտոնի բերումով դա մեղադրանք կհնչի, բայց թե' «մարտի 1»-ի պարագայում, թե' «հոկտեմբերի 27»-ի պարագայում մենք հիմնական դրդապատճառները, հիմնական դերակատարներին, կարծում եմ, բոլորս գիտենք: Մնում է այդ փաստը արձանագրվի և համապատասխան պատիժ լինի»,- ասաց նա։

Սիմոնյանը չբացառեց նաև արտաքին ուժերի շահագրգռությունը:

Հարցին՝ ի՞նչ դասեր պետք է քաղել այս ամեն ինչից, Ալեն Սիմոնյանը պատասխանեց. «Այնքան դասեր ունենք քաղելու թե' ներքին, թե’ արտաքին քաղաքական առումներով: Մենք պետք է հասկանանք, որ աշխարհում որևէ մեկը մեզ սիրելու կամ չսիրելու խնդիր չունի, կան շահեր: Մենք պետք է հասկանանք, որ ներքին խժդժությունները կարող են բերել շատ կտրուկ բաների, պետությունը կարող է դրա պատճառով գլխատվել, նույնիսկ պետականությունը կորցնենք: Կարծում եմ՝ մենք այդ դասերը քաղել ենք, որովհետև նոյեմբերի 9-ից հետո այն ամենը, ինչ տեղի ունեցավ և հետագա ներքաղաքական զարգացումները, նաև այդ դասերի շնորհիվ է, որ գիտակցում ենք, հասկանում ենք, որ, այնուամենայնիվ,  ամենակտրուկ պահերին մենք համախմբվում ենք, հասկանում ենք, որ խոսքն ինչ-որ մեկի հարց չի, ինչ-որ մեկի պաշտոնի հարց չի, մենք պետականություն պահելու խնդիր ունենք»: