Տարածաշրջանը հռչակել ենք «Խաղաղության խաչմերուկ», մշակույթն էլ կարող է նպաստել․ ԿԳՄՍ նախարար

ԿԳՄՍ նախարարը, ողջունելով Ֆրանսիայի մշակույթի նախարարի այցը մեր երկիր, ընդգծել է, որ Հայաստանի և Ֆրանսիայի միջև մշակութային համագործակցության շատ լայն շրջանակ կա, որն ընդգրկում է թե՛ ժամանակակից արվեստի, թե՛ մշակութային ժառանգության պահպանության ոլորտները: Ժաննա Անդրեասյանի խոսքով՝ մշակութային ժառանգության պահպանության ոլորտը մեր կարևորագույն խնդիրներից է. այն հատկապես սուր է Լեռնային Ղարաբաղում հայկական պատմամշակութային ժառանգության վտանգման առումով։

«Մշակույթը հաղորդակցության հեշտացման հարթակ պետք է հանդիսանա: Կառավարությունը, ինչպես գիտեք, մեր տարածաշրջանը հռչակել է որպես «Խաղաղության խաչմերուկ» դիտարկելու անհրաժեշտությունը և հնարավորությունը: Կարծում եմ՝ մշակույթի ներուժը կարող է օգտագործվել նաև տարածաշրջանում խաղաղություն հաստատելու համար, քանի որ մշակույթը մարդկանց միավորելու ճանապարհ է»,- ասել է Ժաննա Անդրեասյանը: