Մինչև հոկտեմբերի 25-ը արցախցի վարորդների նկատմամբ կիրառված տուգանքները բեկանվելու են. ՆԳ փոխնախարար

Ներքին գործերի փոխնախարար Արփինե Սարգսյանը լրագրողների հետ զրույցում անդրադարձավ արցախցի վարորդների խնդիրներին, որնք նրանք բախվում են  Հայաստանում:

Խոսելով մգացված ապակիների խնդրի մասին` Սարգսյանն ասաց, որ մգացված ապակիներով երթեկելու համար 100 հազար դրամ վարչական տուգանք չի նախատեսվում:

«Ասեմ, որ ՃԵԿ կանոնները հավասար են երթևեկության մեջ գտնվող բոլոր անձանց համար, բայց հաշվի առնելով բռնի տեղահանման փաստը ինքնին և նաև մեր հայրենակիցների հուզական վիճակը, երթևեկության կանոններին միգուցե ոչ այդքան լավ տիրապետելը, ծայրահեղ անհրաժեշտությունից ելնելով` մենք որոշում ենք կայացրել, որ Հայաստանի Հանրապետություն մուտք գործելուց հետո, մինչև երեկ, այսինքն` հոկտեմբերի 25-ը, կայացված բոլոր վարչական պատասխանատվության որոշումները, այսինքն` բոլոր տուգանքներն օրենքի շրջանակներում, ըստ էության, կբեկանվեն` ոստիկանության պետի համապատասխան հրամանի շրջանակներում: Հետևապես մեր հայրենակիցները որևէ խնդրի առջև չեն կանգնի մինչև հոկտեմբերի 25-ը ներառյալ կայացված վարչական պատասխանատվության միջոցների մասով: Առիթն օգտագործելով` կցանկանայի մեր հայրենակիցներին խստորեն պահպանել ճանապարհային երթևեկության կանոնները, որովհետև այսօրվանից սկսած, բնականաբար, նույն ռեժիմը կիրառվել չի կարող և այսօրվանից արձանագրված բոլոր խախտումները կփաստաթղթավորվեն և վարչական տույժի նշանակման որոշումը կծանուցվի մեր հայրենակիցներին»,- ասաց Սարգսյանը: 

ՆԳ փոխնախարարը խոսեց նաև տարբեր հրապարակումների մասին, ըստ որոնց պարեկները քաղաքացիներին տուգանել են ԱՊՊԱ պայմանագիր չունենալու կամ մգացված ապակիների համար:

«Նշեմ, որ մեկ ամիս մենք բացառապես իրազեկման  աշխատանքներ են կատարել: Թե' պարեկային ծառայությունը, թե' ՃՈ Արարատի, Արմավիրի, Վայոց ձորի և Սյունիքի մարզերում գտնվող սպայակայան գումարտակների ներկայացուցիչները իրազեկել են մեր հայրենակիցներին վերացնել բոլոր խախտումները և դրանից հետո անցել են դիտարկելու վարչական պատասխանատվության հնարավորության հարցը»,- ընդգծեց Սարգսյանը: