Ավելի քան 10 հազար արցախցիներ լքել են Հայաստանը. Բեգլարյան

Ավելի քան 10 000 բռնի տեղահանված Լեռնային Ղարաբաղից հեռացել են Հայաստանից: Այս մասին APRI Armenia վերլուծական կենտրոնի «Առաջընթաց անորոշության պայմաններում» համաժողովում ասաց Արցախի նախկին պետնախարար Արտակ Բեգլարյանը։

Ըստ նրա` կարևոր է տեղահանվածների՝ Հայաստանում որոշակիություն տեսնելը։

«Շատերը կարող են հեռանալ Հայաստանից, բայց շատերը կարող են մնալ, և դրա համար պետք է պայմաններ ստեղծվեն։ Կարեւորը հասկանալն է, որ խնդիրը քաղաքական է, ոչ թե մարդասիրական։ Մենք պետք է նայենք պատճառներին, ոչ թե հետևանքներին»,- նշեց նա:

Նախկին պետնախարարի խոսքով` պատասխանատվության բաժին ունեն են և՛ Հայաստանի իշխանությունները, և՛ միջազգային կազմակերպությունները։ Բեգլարյանը դժգոհեց ՀՀ կառավարությունում ռազմավարական նպատակի բացակայությունից:

«Նրանք ընտրեցին ձուլման ճանապարհը, և ես կցանկանայի տեսնել մարդկանց վերադարձը հայրենիք գոնե բարձր ինքնավարության մակարդակով՝ միջազգային երաշխիքով։ Ռուս խաղաղապահներն ու միջազգային կազմակերպությունները ձախողել են իրենց առաքելությունը: Այժմ, հայերի Արցախ վերադարձի համար, իդեալականորեն անհրաժեշտ է ՄԱԿ-ի խաղաղապահների տեղակայումը։ Բացի այդ, Լեռնային Ղարաբաղը և հարակից տարածքները պետք է ապառազմականացվեն»,- նշեց նա։

Արտակ Բեգլարյանի խոսքով` այս ճգնաժամը հակահայկական քաղաքականության վրա հիմնված Ադրբեջանի կողմից իրականացված ցեղասպանության արդյունք է։ 

Բեգլարյանը կարևորեց տեղահանվածներին փախստականի կարգավիճակ տալու անհրաժեշտությունը, որպեսզի նրանք կարողանան այդ հիմքով պետական ​​աջակցություն ստանալ:

«Այս մեկ ամսվա ընթացքում ՀՀ իշխանությունները հայտարարություններ արեցին ֆինանսական աջակցության մասին, սակայն մարդիկ ստացել են ընդամենը 100 հազար դրամ, թեև կան բազմաթիվ կարիքներ, որոնք բավարարելու համար ավելի շատ միջոցներ են պահանջում։ Խնդիրը նաև այն է, որ որոշումները կայացվում են առանց ԼՂ ներկայացուցիչների տեսակետները հաշվի առնելու»,- եզրափակեց նա: