Ինչու հետաձգվեց Աննա Հակոբյանի միջոցառումը․ «Հրապարակ»

«Հրապարակ» օրաթերթը գրում է.

«Հոկտեմբերի 19-ին վարչապետի կինը` Աննա Հակոբյանը, նախատեսել էր Հայաստանում «Կին քաղաքական առաջնորդների» գագաթնաժողովի հերթական հավաքն անցկացնել, որի մասին նա հայտարարել էր տարեսկզբին՝ Իրանում, ապա՝ Կիևում: Եվ ՀՀ դիվանագիտական ներկայացուցչությունները վերջին ամիսներին քրտնաջանորեն զբաղված էին դրանով, որպեսզի ներկայացուցչական կազմ հավաքեն Հայաստանում` առաջին տիկնոջ համար ցանկալի անտուրաժ ապահովելու համար, որտեղ նա, բնականաբար, ելույթ կունենար և խաղաղության, հարևանների հետ բարեկամության, Եվրոպայի հետ սերտ համագործակցության գաղափարները կներկայացներ: Սակայն հոկտեմբերի 19-ն անցավ` գագաթնաժողովը չկայացավ:

Մենք ԱԳՆ-ից հետաքրքրվեցինք գագաթնաժողովի ճակատագրով: ՀՀ կառավարության տեղեկատվության վարչությունից մեզ պատասխանել են. ««Կին քաղաքական առաջնորդների ժողովրդավարության, խաղաղության և անվտանգության գագաթնաժողով-Հայաստան» միջոցառումը ծրագրված էր անցկացնել Երևանում՝ 2023 թ. հոկտեմբերի 19-20-ը: Լեռնային Ղարաբաղի դեմ Ադրբեջանի հարձակման և հումանիտար իրավիճակի պատճառով միջոցառումը հետաձգվել է: Գագաթնաժողովի անցկացման նոր ժամկետների մասին որոշում լինելու դեպքում կտեղեկացնենք:

Հավելենք, որ հաջորդ շաբաթ «Կին քաղաքական առաջնորդներ» միջազգային ցանցը գագաթնաժողովի կայքէջում կհեռարձակի ժողովրդավարության, խաղաղության և անվտանգության հարցերում կանանց մասնակցությանը նվիրված առցանց ուղերձներ»:

Սակայն մենք տեղեկացանք, որ նախապես գագաթնաժողովին մասնակցելու համաձայնություն տված կին գործիչներից շատերը սեպտեմբերյան դեպքերից հետո մեկը մյուսի ետևից հրաժարվել են գալ Երևան, և հետաձգելու պատճառներից մեկն էլ դա է»:

Մանրամասները՝ թերթի այսօրվա համարում