Մարդիկ այս օրերին ահռելի մեծ աշխատանք են իրականացնում, իրենց վրա են վերցրել պետության գործառույթներն ու անտրտունջ իրականացնում են․ Իվետա Տոնոյան (տեսանյութ)

Արդեն մեկ ամիս է, ինչ «Գագիկ Ծառուկյան» բարեգործական հիմնադրամը լայնածավալ աջակցության բազմաթիվ ծրագրեր է իրականացնում Արցախից բռնի տեղահանված մեր հայրենակիցների համար։ Այս մասին ֆեյսբուքյան իր էջում գրել է Գագիկ Ծառուկյանի մամուլի խոսնակ Իվետա Տոնոյանը։

««Աջակցություն արցախցիներին. Արվածը, չարվածը և հետագա հսկա անելիքը» թեմայով քննարկման ժամանակ այսօր անդրադարձել եմ ոչ միայն «Գագիկ Ծառուկյան» բարեգործական հիմնադրամի կողմից իրականացվող աշխատանքներին, այլև սեպտեմբերյան ողբերգական իրադարձություններից հետո մեր պետության դեմ ծառացած մարտահրավերներին ու դրանց լուծման հնարավորություններին», - գրել է նա՝ կից հրապարակելով քննարկումից մի հատված։

Իր խոսքում Իվետա Տոնոյանը նախ նշեց, որ մեկ ամիս առաջ «Գագիկ Ծառուկյան» բարեգործական հիմնադրամի աշխատակազմը Գագիկ Ծառուկյանից ստացել է հանձնարարություն՝ ուսումնասիրել, թե առաջնային փուլում ինչի անհրաժեշտություն կա և աջակցության ծրագրերը թիրախային ինչ ուղղություններով պետք է իրականացնել։ Նրա խոսքով՝ առանձնացվել է մի քանի ուղղություն, որոնցով իրականացված ուսումնասիրություններից երկու օր անց միայն՝ սեպտեմբերի 26-ից, բարեգործական աշխատանքները մեկնարկել են։

«Բնականաբար, առաջին պահին, էմոցիոնալ շոկային իրավիճակում և՛ Պարոն Ծառուկյանի, և՛ բարեգործական հիմնադրամի աշխատակազմի, և կամավորների ցանկությունը մեկն էր՝ համաժամանակյա, միանգամից օգնություն տրամադրել բոլորին, բայց հասկանալի է, որ հնարավոր չէ այդ ծավալի աշխատանքը միանգամից իրականացնել։ Հենց առաջին-երկրորդ օրը մենք բախվեցինք համազգային ողբեջգության հետ, որովհետև տասյնակ, հարյուրավոր, հազարավոր հայրենակիցների մոտ առաջնային անհրաժեշտության ապրանքներից սկսած՝ մինչև ամենատարրական անհրաժեշտություն ունեցող ապրանքների բացակայություն կար», - ասաց Տոնոյանը:

Նրա խոսքով՝ բարեգործական աշխատանքների շրջանակներում հիմնադրամն օգնություն է տրամադրել բռնի տեղահանված 27 հազար արցախցու։ Տրամադրվող աջակցությունը ներառում է ինչպես սնունդ, այնպես էլ հիգիենայի պարագաներ, տնտեսական ապրանքներ և առաջին անհրաժեշտության այլ իրեր։

«Ինչպես բազմաթիվ առիթներով ասել է պարոն Ծառուկյանը, իրականում բարեգործությունով ոչ երկիր կկառուցես, ոչ էլ խորքային խնդիրներ կկարողանաս լուծել։ Դա փաստ է։ Այստեղ գտնվող մարդիկ, կազմակերպությունները, նաև այն մարդիկ, որոնք այստեղ չեն, բայց այս օրերին ահռելի մեծ աշխատանք են իրականացնում, իրենց վրա են վերցրել պետության գործառույթներն ու անտրտունջ իրականացնում են։ Ես շատ մեծ հետաքրքրություն ունեմ այն հարցի հետ կապված, թե, օրինակ, գործող պատգամավորներից, կապ չունի, թե որ ուժն են ներկայացնում, քանի՞սն են այս ընթացքում կամավորական որևէ աշխատանքի մասնակցել, անձամբ տեսալ այն մարդկանց հետ, որոնք հայրենիք են կորցրել։ Ոչ թե ծառայողական մեքենաների պատուհանից, կառավարական ամառանոցների պատշգամբներից են տեսել այդ մարդկանց ողբերգությունը, այլ իրականում։ Որպեսզի հասկական ողբերգության այն ծավալը, որի մեջ ապրում է այսօր Արցախից տեղահանված մեր հայրենակիցը»,- ասաց Իվետա Տոնոյանը՝ հավելելով, որ համազգային տարանջատումների միտումը բերել ու հասցրել է մի կետի, որից այն կողմ շատ վտանգավոր իրողություն է լինելու։

Մանրամասները՝ տեսանյութում։