Ի՞նչ ակնկալիքով են «ՀայՓոստի» անունից եկած կեղծ հղմանը սեղմում նրանք, ովքեր ոչ մի ծանրոց չունեն ստանալու

Այսօր, օգտվելով համակարգչի, սմարթֆոնի և ինտերնետի ընձեռած հնարավորություններից, ֆինանսական գործարքների մեծ մասը հնարավոր է կատարել առցանց։ Օգտվելով առիթից` այս ֆոնին ակտիվացել է հաքերությունը։

Մեդիափորձագետներն ու ոստիկանությունը խարդախությունների վերաբերյալ մտահոգիչ քանակի ահազանգեր ու հաղորդումներ են ստանում այն մասին, որ «ՀայՓոստի» անունից նամակներ են գնում տարբեր հեռախոսահամարների՝ մարդկանց ծուղակը գցելու համար։ Նման խարդախություններ գրանցվել էին դեռ ամիսներ առաջ։ Այն բացահայտելուց ու դրա մասին ակտիվ տեղեկատվություն տարածելուց հետո, խարդախությամբ զբաղվող խմբակները կամ խմբավորումները մի պահ դադար վերցրին։ Օրերս դարձյալ մեծ ակտիվությամբ այն սկսեց շրջանառվել։ 

Աշխատում է մանրամասն հաշվարկված, մշակված ու, այսպես ասած, ինտելեկտուալ հանցավոր մեխանիզմ։ Հեռախոսահամարին գալիս է SMS, որը տեղեկացնում է, թե իբր ձեր ծանոցի կամ բեռի մասին տեղեկությունները կորել են ու թարմացնելու համար պետք է գնալ նշված հղումով։ Մնում է միայն անցնել իր ուղարկած «Հայփոստի» կայքի հղումով, ենթադրյալ ծանրոցն ստանալու համար լրացնել բանկային քարտի տվյալները և սպասել առաքիչի զանգին, որը կգա ու կտա ծանրոցը։

Մասնագետի խոսքով՝ հենց այստեղ կիրառվում է տեխնոլոգիական հնարք։

Հղումներով անցնելով՝ ընկում եք ծուղակը։ Մեդիափորձագետներն զգուշացրել են, թե ինչ պետք է անել, եթե խարդախության զոհ եք դարձել, սակայն մինչ այդ պետք է հարցերին մոտենալ ըմբռնումով։

Հարկ է նշել, որ ուղարկած հղումը, որն առաջին հայացքից ոչնչով չի տարբերվում փոստային ծառայության պաշտոնական կայքից, իրականում պարզապես դրա լավ մշակված կրկնօրինակն է։ Խարդախը հասանելիություն է ստանում ցանկացած տվյալի, որը մուտքագրվում է կեղծ կայքում։ Ստանալով Ձեր բանկային տվյալները՝ նա անարգել տնօրինում է ձեր ֆինանսական միջոցները, այլ խոսքով՝ ձեր բանկային քարտից փոխանցումներ ու կանխիկացումներ է անում։

Մի կերպ գուցե կարելի է հասկանալ նրանց, ովքեր ծանրոցի են սպասում։ Սակայն, թե ինչ ակնկալիքով են հղմանը սեղմում նրանք, ովքեր ոչ մի ծանրոց չունեն ստանալու՝ պարզ չէ։ Հավանաբար, նրանց թվում է, որ օդից գումար կամ բեռ են «կպցրել»։ 

Ամեն դեպքում, հարկավոր է զգոն լինել ու չտրվել «հեշտ ճանապարհով» ծանրոց ստանալու գայթակղությանը։