Ժպիտի ոչ լայն կամ լայն լինելն ո՞վ է ֆիքսել ու ընդհանրապես, Էդ ի՞նչ վերաբերմունք է՝ Անդո, Գուգո, Սամո․․․ Անդրանիկ Քոչարյանը՝ հայտնի լուսանկարի ու իրենց զբոսանքի մասին (տեսանյութ)

ՔՊ-ական Անդրանիկ Քոչարյանը չի հասկանում, թե համացանցում ինչու էր այդքան ակտիվ քննարկվում իր, Սամվել Բաբայանի և Գուրգեն Արսենյանի «զբոսանքի» լուսանկարը։ Հիշեցնենք, որ լուսանկարն արվել է Հայաստանում՝ Արցախի ներկայացուցչության շենքի դիմաց տեղի ունեցած բախումից հետո։ 

Լուսանկարում երևում է, թե ինչպես են վերոհիշյալ պաշտոնյաները լայն ժպիտով քայլում։

«Ժպիտի ոչ լայն, կամ լայն լինելը չհասկացա, թե ով է ֆիքսել»,-իր հարցն ուղղեց նա լրագրողին, երբ վերջինս ներկայացրեց լուսանկարի հետ առնչվող տեսակետը, ըստ որի, արցախցիների միջև բախումը կազմակերպվել էր հիշյալ եռյակի նախաձեռնությամբ։

Ըստ նրա, եթե լրագրողը նկատել է իրենց, ապա կարող էր մոտենալ ու հարցնել, թե ինչու են ժպտում։

«Կարող է՝ միասին ժպտայինք»,-ասաց Քոչարյանը։

Ընդհանրապես, Անդրանիկ Քոչարյանին «թվում է», որ իր ու էլի մի քանի պաշտոնյաների, այդ թվում լուսանկարում հայտնված անձանց նկատմամբ, անհարգալից վերաբերմունք է դրսևորվում։

«Էդ ի՞նչ վերաբերմունք է՝ Անդո, Գուգո, Սամո, բայց Արմեն Խաչատրյանի նկատմամբ հարգալից է (նկատի ունի ՔՊ-ական պատգամավոր Խաչատրյանին-խմբ․)»,-ասաց Անդրանիկ Քոչարյանը, ինչը շարժեց լրագրողների ծիծաղը։

«Ա՜յ, բոլորդ ծիծաղեցիք, չէ՞»,-ասաց նա։