Ինչո՞ւ է իշխանությունը հանրությանը հրամցնում, թե Արցախը հանձնել են նրանք, ովքեր վերջին 10 օրն են կառավարել և ինչու Անդրանիկ Քոչարյանը ջղաձգվեց հարցից (տեսանյութ)

Ամեն մեկը պետք է պատասխան տա իր արածի կամ չարածի համար։ Այս մասին լրագրողների հետ զրույցում ասաց ՔՊ-ական Անդրանիկ Քոչարյանը՝ արձագանքելով լրագրողի հարցին, թե ինչո՞ւ են իշխանությունները հանրությանը հրամցնում, որ Արցախը հանձնել են նրանք, ովքեր վերջին օրերին են կառավարել այնտեղ։

«Ես իմ արածի կամ չարածի համար պատասխան կտամ, բայց այն, ինչ որ արվեց Արցախում մինչև հայաթափումը, կատարվածի համար պատասխան պետք է տան ԼՂ իշխանությունները»,- ասաց նա։

Մեկ այլ լրագրողի դիտարկմանը, թե 2021-ին ՀՀ իշխանությունները հայտարարում էին, թե Արցախի անվտանգության երաշխավորն են, Անդրանիկ Քոչարյանն արձագանքեց, թե դա այլ խնդիր է։ Նա նաև տեղեկացրեց, որ ստեղծվելու է հանձնաժողով պարզելու, թե ովքեր են մեղավոր։

«Ի՞նչ ստորագրվեց, ո՞վ ստորագրեց, շպառգալկան ո՞վ տվեց... արդյունքն այն է, որ Արցախը հայաթափված է, բայց դա արդյոք հեռանկարից զրկե՞լն է։ Այ, հեռանկարից զրկումն այն է, որ մարդը, ով 22 ձայնով վերցրեց Արցախի կառավարումն իր վրա, Հայաստան է եկել ու ասում է՝ թուղթ չկա»,- ասաց Անդրանիկ Քոչարյանը։

Նա նաև կասկածներ ունի, թե այդ ինչպես է Սամվել Շահրամանյանին հաջողվել անցնել անցակետով։

Դիտարկումը, թե հավանաբար այնպես, ինչպես, օրինակ, Սամվել Բաբայանին է հաջողվել, Անդրանիկ Քոչարյանին այնքան էլ դուր չեկավ։

«Սամվել Բաբայանն արդեն ասել է, թե ովքեր են իրեն ուղեկցել ու ինչպես է անցել, իսկ Շահրամանյանը չի բացատրել` ինչպես է անցել»,- ասաց նա։

Լրագրողի հարցը դուր չեկավ Անդրանիկ Քոչարյանին, թե ենթադրենք 10 օրվա համար իրենից ենք պատասխաններ պահանջելու, իսկ 5 տարվա համար ումի՞ց պահաջենք։ Քոչարյանը, իրեն հատուկ ոճի մեջ, սկսեց թիրախավորել առանձին լրագրողների ու այդպես էլ չպատասխանեց, թե ինչու են ՀՀ գործող իշխանությունները, ովքեր դեռ իրենց նախընտրական ծրագրերում հայտարարել են, թե երաշխավոր են ու պաշտպանելու են Արցախը, որ թույլ չեն տալու Արցախը լինի ադրբեջանական ու, որ Արցախը Հայաստան է, ինչո՞ւ են այսօր հեշտ ու հանգիստ հայտարարում, որ Արցախը ճանաչում են Ադրբեջանի տարածքային ամբողջականության մեջ։