Հրավիրում ենք իրավապահների ուշադրությունը. «Tiktok»-ում երեխաների անունից սեռական բնույթի ծառայություններ են առաջարկվում

Սոցցանցերն աշխարհում` ընդհանրապես, իսկ Հայաստանում` մասնավորապես, մեծ հաշվով չարիք են դարձել հասարակության համար: Ատելություն, թշնամանք, քննադատություն, վիրավորանքներ միմյանց հասցեին: Բայց այս ամենը, պարզվում է, միայն չարյաց փոքրագույնն է: Ֆեյսբուքյան գաղջ իրականությանը փոխարինելու է եկել շատ ավելի խայտառակ «TikTok» սոցցանցը: 

«Ռեք» կոչվածներում ամեն քայլափոխի հանդիպում են սեռափոխված կամ կին երևալ փորձող տղամարդիկ, վուլգար, կիսամերկ, ամենավերջին հայհոյանքներով խոսող կանայք:

Բայց դա էլ ամենը չէ: 

Այս հարթակում մի շարք օգտահաշիվներ, որոնց մի մասը ներկայացնում ենք լուսանկարների տեսքով, վերցնում են ընդհուպ երեխաների մասնակցությամբ տեսանյութեր, տեղադրում դրանք` վրան գրելով սարսափելի հայհոյանքներ, վիրավորանքներ և այդ երեխաների անունից նույնիսկ առաջարկվում են ինչ-որ սեքսուալ ծառայություններ, որոնց հետ այդ երեխաները կապ չունեն: 

Էլ չենք խոսում այն մասին, որ այդ կոնտենտը նաև այլ երեխաներ են դիտում, և խեղվում է նրանց գիտակցությունը, ինչը կարող է ողբերգական հետևանքների հանգեցնել:  

Բացի այս ամենից, ըստ որոշ տեղեկությունների` այդպիսի գործունեությամբ զբաղվող անձինք նաև շորթումներ են իրականացնում` տեսանյութերը հեռացնելու դիմաց պահանջելով գումարներ:  

Սա, եթե չչափազանցնենք, ո'չ ավել, ո'չ պակաս ազգային անվտանգության հարց է, երբ փաստորեն, մեզանից յուրքանչյուրը, որը գրեթե մեկ լուսանկար է հրապարակել ինչ-որ սոցցանցում, կարող է դառնալ խարդախությամբ ու անբարոյականությամբ աշխատող շորթողների զոհ: 

Ըստ այդմ` հրավիրում ենք Հայաստանի բոլոր իրավապահ մարմինների ուշադրությունը, որպեսզի առանձին-առանձին զբաղվեն նշված և այլ էջերով, պետք է օր առաջ կանխել այն աղետը, որը սպառնում է նույնիսկ իրավապահ համակարգերի ղեկավարների ընտանիքների ու երեխաներին:

NEWSPRESS.am