Հայաստանի շահերի մեջ չի մտնում լինել Ռուսաստանի գործիքը. Ռուբեն Մեհրաբյան

Հայաստանի Հանրապետությունը կանգնած է ուղղակի վտանգի առաջ. վտանգ, որը գալիս է Ռուսաստանից:

Newspress.am-ի հետ զրույցում ասաց քաղաքագետ Ռուբեն Մեհրաբյանը` պատասխանելով հարցին, արդյոք ռուս-թուրքական հարաբերությունների սրման ֆոնին Ռուսաստանը մտադիր է օգտագործել Հայաստանի օդային և ցամաքայինտարածքը` Թուրքիայի դեմ գործողություններում:

«Ռուսաստանը պետք է դադարեցնի իր փորձերը` Հայաստանի գործոնն օգտագործելու Թուրքիայի հետ իր հաշիվները մաքրելու համար: Հայաստանն ինքնիշխան պետություն է և առաջնորդվում է իր շահերով, իսկ Հայաստանի շահերի մեջ չի մտնում լինել Ռուսաստանի գործիքը: Սա ուղղակի սպառնալիք է Հայաստանի համար»,- ասաց քաղաքագետը:

Ըստ նրա` Հայաստանը պետք է բավականին կոշտ ձևով հանդիմանի Ռուսաստանին իր փորձերը դադարեցնելու համար:
«Հայկական դիվանագիտության թիվ մեկ խնդիրն է այսօր թույլ չտալ, որպեսզի Ռուսասատան- Թուրքիա դիմակայության մեջ բացվի, այսպես կոչված, կովկասյան ճակատ, ինչը պատմության ընթացքում բազմիցս եղել է և դա է դարձել հայկական աղետների հիմնական պատճառը: Չեն կարող խաղալ Հայաստանի ճակատագրի հետ»,- նկատեց Ռուբեն Մեհրաբյանը:

Նկատենք, որ Հայաստանում Ռուսաստանի դեսպան Իվան Վոլինկինին ուղղված լրատվամիջոցներից մեկի հարցին, մտադիր է արդյոք Ռուսաստանն օգտագործել Հայաստանի օդային ու ցամաքային տարածքը Թուրքիայի դեմ, վերջինս տվել է խուսափողական պատասխան: Նա նշել է, որ «Հայաստանի տարածքում ռուսական ռազմական երկարաժամկետ ներկայությունը նախատեսված է «Հայաստանում ռուսական ռազմական բազայի» մասին միջկառավարական պայմանագրով, որը ստորագրվել է 1995 թվականին»:

Անդրադառնալով դեսպանի պատասխանին` Մեհրաբյանը նկատեց. «Երբ դեսպանը խոսում է 1995 թվականի պայմանագրից` թող բարի լինեն դադարեցնել իրենց ռազմական մատակարարումները Ալիևի ռեժիմին»: