Իմ երեխան ընտրել է բուհ, որը չի գտնվում Հայաստանում․ դուք մտնում եք իմ անձնական տվյալների տիրույթ, որի իրավունքը բացարձակ չունեք․ ԿԳՄՍ նախարարը չի՞ վստահում իր ղեկավարած համակարգին

Այսօր՝ հոկտեմբերի 19-ին, կառավարության նիստից հետո ԿԳՄՍ նախարար Ժաննա Անդրեասյանը պատասխանեց լրագրողների որոշ հարցերի։ Նրան դուր չեկավ լրագրողի հարցը՝ կապված իր երեխաների կրթության հետ։ 

Լրագրողը փորձեց ճշտել՝ ինչո՞ւ է կրթության նախարարը որոշել իր երեխային ուսման տալ արտերկրում և արդյոք ՀՀ-ի կրթական համակարգը զիջո՞ւմ է որակային առումով։ 

«Ես կարծում եմ, որ իմ երեխաների կրթության ու անձնական որոշումների իրավունքը չի կարելի վիճարկել»,- նեղսրտած ասաց ԿԳՄՍ նախարարը։

Նա նշեց, որ իր երեխաները սովորել են Հայաստանում՝ հանրակրթական դպրոցներում ու այս պահին նրանցից մեկն է արտերկրում։

«Իմ երեխաներից մեկը բարձրագույն կրթության համակարգ է մուտք գործել ու իր անձնական որոշմամբ ընտրել է այն բուհը, որտեղ շարունակում է կրթությունը։ Այդ բուհը չի գտնվում Հայաստանում ու ես համարում եմ, որ դուք մտնում եք մի աձնական դաշտ, որի իրավունքը չունեք։ Իմ երեխաները, ինչպես մեր երկրում ցանկացած քաղաքացու երեխաներ, ազատ են որոշելու՝ որտեղ են ուզում շարունակել իրենց կրթությունը, ու որևէ մեկը չի ասել, որ իմ երեխաներն  այն պատճառով, որ իրենց մայրը պաշտոն է զբաղեցնում, պետք է խտրական մոտեցման հանդիպեն կամ սահմանափակված լինեն իրենց որոշման ազատության մեջ»,- ասաց Ժաննա Անդրեասյանը։