Տեղի է ունենում այն, ինչ կանխատեսել ենք. Լևոն Քոչարյանի փաստաբան

Երևանի ընդհանուր իրավասության դատարանում՝ դատավոր Մասիս Մելքոնյանի նախագահությամբ, ընթանում է ՀՀ երկրորդ նախագահ Ռոբերտ Քոչարյանի որդու՝ Լևոն Քոչարյանի կալանավորման ժամկետի երկարացման միջնորդության քննարկման վերաբերյալ դատական նիստը: 

Լրագրողների հետ զրույցում փաստաբան Ալեքսանդր Կուչուբաևը նկատեց, որ տեղի է ունենում այն, ինչ կանխատեսել են և որևէ ակնկալիք չունեն, որ Մնացական Մարտիրոսյանն այլ դատավորի կմակագրի, կամ Մասիս Մելքոնյանը կունենա անհրաժեշտ անաչառություն, օբյեկտիվություն, բարոյականություն, որպեսզի այս գործով ինքնաբացարկ հայտնի։

«Մասիս Մելքոնյանը  չի կարող լինել և չի կարող երևալ անաչառ դատարան՝ պայմանավորված իր քաղաքական գործունեությամբ, իր քաղաքական թիմի ղեկավարի բացառիկ ատելությամբ՝ ուղղված երկրորդ նախագահ Ռոբերտ Քոչարյանին։ Արդեն իսկ պրոցեսը մեկնարկում է իրավունքների խախտմամբ: Այս վարույթում չկա ոչինչ, որը կարող է բավարարել  մեղադրանքի կողմից ներկայացվող պահանջներին, մենք գործ ունենք բացառապես քաղաքական մոտիվի հետ, սա արտաիրավական քրեական հետապնդում է»,- ասաց նա: