New York Times-ը «Իսրայելի կողմից» արտահայտությունը հեռացրել է Գազայի հիվանդանոցի վրա հարձակման նյութում

Ամերիկյան New York Times թերթն իր խորագրով սկզբում նշել է, որ, ըստ Պաղեստինի, Գազայի հիվանդանոցի վրա հարձակումը, որի հետևանքով զոհվել է մոտ 500 մարդ, իրականացվել է Իսրայելի կողմից, իսկ հետո փոխել է վերնագիրը՝ հանելով իսրայելցիների մասին հիշատակումը։ Այս մասին գրում է РИА Новости գործակալությունը։ 

Հիշեցնենք, որ երեքշաբթի օրը հարված է հասցվել Գազայի հատվածի Ալ-Ահլի հիվանդանոցին։ Գազայի առողջապահության նախարարությունը հայտնել է, որ զոհվել է ավելի քան 500 մարդ, որոնց մեծ մասը կանայք և երեխաներ են: Պաղեստինցիներն ու իսրայելցիները մեղադրում են միմյանց հարձակման համար, ընդ որում Պաղեստինի ԱԳՆ-ն հայտարարել է, որ հարձակումն իրականացվել է իսրայելական ինքնաթիռների կողմից, իսկ իսրայելական բանակը հայտարարել է, որ հիվանդանոցը խոցվել է պաղեստինյան «Իսլամական ջիհադ» խմբավորման կողմից անհաջող արձակված հրթիռից:

Նախկինում լուրը վերնագրված էր «Պաղեստինի առողջապահության նախարարությունն ասում է, որ Իսրայելի ավիահարվածը թիրախավորել է Գազայի հիվանդանոցը, որի հետևանքով զոհվել է 500 մարդ»: Սակայն ավելի ուշ, երբ հայտնվեցին հարձակման նոր մանրամասներ, լուրըվերանվանվեց. «Իսրայելցիներն ու պաղեստինցիները միմյանց մեղադրում են Գազայի հիվանդանոցում տեղի ունեցած պայթյունի համար, որը հարյուրավոր մարդկանց կյանք խլեց»: