Իմ վարկանիշն եմ բարձրացրել` իրենց չեղած վարկանիշի հաշվին. Անահիտ Բախշյանը` ՏՄՊՊՀ-ին

«Իհարկե ցանկացել եմ իմ վարկանիշը բարձրացնել, անկասկած. իմ վարկանիշն եմ բարձրացրել իրենց չեղած վարկանիշի հաշվին»:

Newspress.am-ի հետ զրույցում ասաց «Բարև Երևան» խմբակցության անդամ Անահիտ Բախշյանը` անդրադառնալով Տնտեսական մրցակցության պաշտպանության պետական հանձնաժողովի կողմից արված հայտարարությանը: ՏՄՊՊՀ-ի հայտարարության մեջ մասնավորապես ասվում էր, թե «…տպավորություն է, որ տիկին Բախշյանը իր հերթական հոդվածի միջոցով փորձել է բարձրացնել սեփական վարկանիշը՝ իբրև թե «աղմկոտ բացահայտում» անելով»:

Հիշեցնենք, որ մի քանի օր առաջ «Բարև Երևան» խմբակցության անդամ Անահիտ Բախշյանը, իր խոսքով «էքսկուրս է կատարել» ՀՀ ՏՄՊՊՀ կայքէջում և պարզել, որ «Տնտեսական մրցակցության պաշտպանության պետական հանձնաժողովը ստախոս կառույց է»:

Մասնավորապես անդրադառնալով ՏՄՊՊՀ-ի նախագահ Արտակ Շաբոյանի ներկայացրած բենզինի գների մասին հաշվետվությանը` Անահիտ Բախշյանը տեսել է, որ այն կայքում չկա: Նա նաև նկատել է, որ որոշ վերնագրով էջեր չեն բացվում ընդհանրապես: ՏՄՊՊՀ-ի դեմ ուղղված հայտարարության մեջ «Բարև Երևան» խմբակցության անդամը կասկած է հայտնել վերջինիս թափանցիկ ու անաչառ գործունեության վերաբերյալ:

Newspress.am-ի հետ զրույցում Անահիտ Բախշյանը մեկ անգամ ևս վստահեցրեց, որ այն ինչ գրել է ինքը, ճիշտ է: Նա նշեց, որ կայքում միայն փետրվարի 4-ով է ավելացվել կառավարությում ներկայացված բենզինի գների մասին հայտարարությունը: Անահիտ Բախշյանը վստահեցնում է, որ դա չի եղել այն ժամանակ:

«Անամոթաբար վերցրել, դրել են ամսի 4-ի տակ»,- հավելեց նա: