Գալստյանի ընտանիքի անդամները քննարկում են Թաթուլ Հակոբյանին զրպարտության համար դատի տալու հարցը

Շուշիի «Ավան պլազա» հյուրանոցի նախկին տնօրեն Սարգիս Գալստյանի ընտանիքի անդամները քննարկում են լրագրող Թաթուլ Հակոբյանի դեմ հայցադիմում ներկայացնելու հարցը։ Այս մասին «Փաստինֆո»-ի հետ զրույցում ասաց Արցախի «Արդարություն» խմբակցության ղեկավար Դավիթ Գալստյանը, որը Սարգիս Գալստյանի հորեղբոր որդին է։

Հիշեցնենք, որ հոկտեմբերի 3-ին լրագրող Թաթուլ Հակոբյանն իր ֆեյսբուքյան էջով հայտնել էր, որ Շուշիի «Ավան պլազա» հյուրանոցի նախկին տնօրեն Սարգիս Գալստյանը նշանակվել է Արցախում Ադրբեջանի ներկայացուցիչ՝ պարետ։ Տեղեկությունը տարածվել էր ոչ միայն հայկական, այլ նաև ադրբեջանական լրատվամիջոցներով, մինչդեռ պարզ դարձավ, որ Ադրբեջանի նախագահ Իլհամ Ալիևը Ստեփանակերտում պարետ է նշանակել ոստիկանության գեներալ-մայոր Սարդար Սաֆարովին։

Հատկանշական է, որ ի սկզբանե, շահարկման առարկա էր դարձվել Սարգիս Գալստյանի՝ Արցախի ԱԺ ընդդիմադիր պատգամավորի ազգականը լինելու հանգամանքը։ Դավիթ Գալստյանը հայտարարել էր, որ պատրաստվում է հայցադիմում ներկայացնել դատարան՝ զրպարտության համար, սակայն, մինչ հայցը կներկայացվեր, Սաֆարովի նշանակումից հետո Հակոբյանը «խմբագրել է» գրառումը՝ հեռացնելով պատգամավորի անունը։ Այդուհանդերձ, Սարգիս Գալստյանի ընտանիքի անդամները քննարկում են հայցադիմում ներկայացնելու հարցը։

Դավիթ Գալստյանը «Փաստինֆո»-ի հետ զրույցում ասաց, որ հարցը դեռևս քննարկվում է փաստաբանների հետ, վերջնական որոշումը մոտակա օրերին կկկայացվի։

«Նա իր ընտանիքի հետ կապի մեջ է պարբերաբար։ Այն, ինչ կատարվում է, նա տեղյակ է։ Քանի որ ինքն անմիջապես չի կարող հայցը ներկայացնել՝ Ստեփանակերտում գտնվելու պատճառով, ապա այն պետք է ներկայացնեն ընտանիքի անդամները»,- նշեց Գալստյանը։