Եթե Հաագայի դատարանը քայլեր չձեռնարկի, անշրջելի ծանր հետևանքներ կլինեն․ Էլիս Մակդոնալդ

Լեռնային Ղարաբաղից էթնիկ հայերի նկատմամբ վտանգի ռիսկը հրատապ է։ Այս մասին այսօր՝ հոկտեմբերի 12-ին, հայտարարել է Արդարադատության միջազգային դատարանում Ադրբեջանի դեմ Հայաստանի բողոքի քննության ժամանակ Հայաստանը ներկայացնող պրոֆեսոր Էլիս Մակդոնալդը։

Նա նշեց, որ արտագաղթի մասշտաբները և հասցված վնասի չափը հսկայական են․ մենք այստեղ ենք, որպեսզի կանխենք ավելի մեծ կորուստները։

 Էլիս Մակդոնալդի խոսքով` իրավիճակը ողբերգական է. մարդիկ ընդամենը մի քանի օրում լքել են իրենց պատմական հայրենիքը։

«Մտածեք, թե ինչի միջով են նրանք անցել։ Նրանք կորցրել են ամեն ինչ՝ տունը, պատմությունը, իրենց նախնիների հայրենիքը։ Նրանցից մեկն ասել է՝ այնքան դժվար էր հեռանալ, մի քիչ հող վերցրեցի իմ երկրից, ալբոմ ու մի քանի տաք հագուստ։ Հանրության ողբերգությունը նոր-նոր ենք սկսում ընկալել։ Հնարավոր է ավելի խոր վտանգներ լինեն, եթե Հաագայի դատարանը քայլեր չձեռնարկի»,- ասաց նա՝ հավելելով, որ չպետք է թույլ տալ անշրջելի ծանր հետևանքեր լինեն։

Էլիս Մակդոնալդի խոսքով` ակնթարթային ագրեսիան եկավ ամիսներ տևած պաշարումից հետո: Հայաստանը նրանց գրկաբաց ընդունեց, և միջազգային հանրությունը կօգնի։ Բայց սա միակ հարցը չէ։

Իրենց պապենական հայրենիք վերադառնալու նրանց կարողությունը կախված է միջազգային կոնվենցիայի պահանջների կատարումից։ Ադրբեջանն այժմ անընդհատ ոտնահարում է նրանց իրավունքները, կլանում է Լեռնային Ղարաբաղը բոլոր իմաստներով, ոչնչացնում է տարածաշրջանի հայկական էությունը՝ հայերի վերադարձի հնարավորությունը բացառելու համար։