«Հանրապետությունը» վերցնում է Երևանը․ «Հրապարակ»

«Հրապարակ» թերթը գրում է.

«Երեկ հայտնի դարձավ, որ Երևանի երեք վարչական շրջանների ղեկավարներ՝ Էրեբունու թաղապետ Հակոբ Բալայանը, Արաբկիրի թաղապետ Արամ Ազատյանն ու Աջափնյակի թաղապետ Կամսար Բաբինյանը, ազատվել են աշխատանքից։

Քաղաքապետարանին մոտ կանգնած մեր աղբյուրը հայտնեց, որ սա ձևական որոշում է` ավագանու անդամ թաղապետներն ազատվում են, բայց Ավինյանը պատրաստվում է երեքին էլ վերանշանակել իրենց պաշտոններում:

Սակայն պաշտոնից կազատեն Մալաթիա-Սեբաստիայի թաղապետ Արման Բարխուդարյանին, Նոր Նորքի թաղապետ Արմեն Մհերյանին և Դավթաշենի թաղապետ Ռոման Համբարձումյանին, քանի որ այս երեք վարչական շրջանների ղեկավարների պաշտոնները` քաղաքական առևտրի շրջանակներում, պատրաստվում են զիջել Արամ Սարգսյանի «Հանրապետություն» կուսակցությանը, որի հետ կոալիցիայի շնորհիվ Ավինյանը դարձավ Երևանի քաղաքապետ։

Մենք հետաքրքրվեցինք, թե ովքեր են վարչական շրջանների ղեկավարների թեկնածուները: Եթե Նոր Նորք և Դավթաշեն համայնքների հետ կապված՝ «Հանրապետությունը» դեռ քննարկումների մեջ է՝ ում նշանակել թաղապետ, ապա իշխանությունների սրտի գործարար Սամվել Ալեքսանյանի հայրենի Մալաթիայում «Հանրապետությունը» որոշել է թաղապետ նշանակել ԵԿՄ կենտրոն տարածքային կազմակերպության ղեկավար Ռոմիկ Մխիթարյանին:

Դեռևս գործող թաղապետ Արման Բարխուդարյանը երեկ հրաժեշտի ցերեկույթ է կազմակերպել թաղապետարանում` աշխատակիցներին պատվոգրեր ու շնորհակալագրեր հանձնել։ Ինչ վերաբերում է Ռոմիկ Մխիթարյանի ընտրությանը, ապա նա լավ հարաբերություններ ունի Մալաթիայում ազդեցիկ ընտանեկան կլաններից մեկի՝ Հակոբ Հակոբյանի (Լեդի Հակոբի) ազգուտակի հետ»:

Առավել մանրամասն թերթի այսօրվա համարում։