Գյուղացիներն օգնում են «Ֆլեշի» Բարսեղին

Կառավարությունը հաստատել է ՀՀ հողօգտագործողներին 2016թ.-ին գյուղատնտեսական աշխատանքների համար մատչելի գներով դիզելային վառելանյութի ձեռքբերման նպատակով պետական աջակցության ծրագիրը: Պահանջարկը կազմում է 6 000 000 լիտր, որը հողօգտագործողներին կտրամադրվի 1 լիտրը 280 դրամով: 2012թ-ից գյուղատնտեսության նախարարությունը նախաձեռնել է մատչելի կոչվող աջակցության ծրագիրը: Այն է` շուրջ 1 մլն դոլարի պետբյուջեն սուբսիդիա է տալիս հայտնի գործարար «Ֆլեշի» Բարսեղին կամ Բարսեղ Բեգլարյանին, որ վերջինս մատչելի դիզվառելիք մատակարարի հողօգտագործողներին:

Ներկրման մրցույթ չի հայտարարվում: Այս տարի «Ֆլեշը» մատակարարելու է շուրջ 6 մլն լիտր դիզվառելիք, որից 55 դրամը սուբսիդավորելու է կառավարությունը, այն է մոտ մեկ միլիոն դոլար, իսկ հողօգտագործողներին 1 լիտր 335 դրամի փոխարեն դիզվառելիքը կտրվի 280 դրամով: Այս ծրագիրը կոչվում է մատչելի: Փորձենք հասկանալ ծրագրի էությունը: Մեկ հեկտարի համար հողօգտագործողին տրվում է 200 լիտր, առավելագույն քանակ է սահմանված 600 լիտրը: Կարող ենք հիշեցման կարգով նշել, որ Արարատի մարզի Մխչյան գյուղում 15 ընտանիք ստացել էր պետության կողմից սուբսիդավորվող 70 հազար լիտրից ավելի դիզվառելիք:

Միայն 35 հազար լիտր դիզվառելիք հատկացվել է Հովհաննես Աբրահամյանին: 2013թ-ին նման հայտարարությամբ հանդես եկավ ՀՀ ֆինանսների նախարարության ֆինանսների վերահսկողության տեսչության պետ Սոնա Ղարիբյանը: Նույն 2013թ-ին 4531 բնակիչ ունեցող գյուղում միայն 15 հոգի են ներառվել մատչելի դիզվառելիք և պարարտանյութ ստացողների ցուցակներում: Ս. Ղարիբյանը նաև չժխտեց, որ Հովհաննես Աբրահամյանը ազգակցական կապ ունի ԱԺ նախագահ Հովիկ Աբրահամյանի հետ:

Ֆինանսների վերահսկողության տեսչությունը 2013թ-ին ստուգումներ է իրականացրել չորս մարզերում` Արարատ, Գեղարքունիք, Կոտայք և Շիրակ. Կառավարության կողմից սուբսիդավորված դիզվառելիքի և պարարտանյութի բաշխման ընթացքում խախտումներ և չարաշահումներ են գրանցվել, ամենախոշոր չարաշահումները գրանցվել են հենց Արարատի մարզում և միայն Արարատի մարզում պետությանը հասցվել էր 83 մլն դրամի վնաս: Սա ի միջի այլոց, 2013թ-ից հետո ստուգումներ ոլորտում չի անցկացվել: Խոսակցություններ կան, որ դիզվառելիքը պակաս է մատակարարվում, հետո մեծաքանակ գնում է կատարվում, ու կրկին վերավաճառվում, իսկ սուբսիդիայի 55 դրամը կրկին վերադառնում է ոմանց գրպանները, մեջտեղում մնում է 1 մլն դոլար հենց այնպես վճարած պետությունը, իսկ թե հողօգատգործողներին օգնությունը ինչքանով է օգնել: Այս տարիներին ոչ վարելու, ոչ հերկելու և ոչ էլ 1 հա-ը տափանելու գները ոչ միայն չեն իջել, այլ նաև ավելացել են: 1 հա-ը վարում, ցանում են շուրջ 50 հազար դրամով, իսկ թե սուբսիդան որքա՞ն է օգնելու` թող դատեն ընթերցողները: 

Մեր տեղեկություններով, գյուղատնտեսության նախարարությունում այնքան էլ գոհ չեն այս փառահեղ ծրագրից, սակայն այստեղ կա Բարսեղ Բեգլարյանի ֆիգուրը: Դեռ նախկին վարչապետ Տիգրան Սարգսյանի ժամանակներից «Ֆլեշը» սկսեց մեծածավալ սուբսիդիաներ ստանալ կառավարությունից` իր բոլոր հետևանքներով: Հավելենք նաև, որ վերջին շրջանում կտրուկ նվազել է նավթի գները, ինչպես ասում են` դարձել է «ջրի գին», սակայն վառելիքը Հայաստանում, ինչպես միշտ, իր բարձրության վրա է` ի շնորհիվ նաև այս ոլորտում գերիշող դիրք ունեցող «Ֆլեշ» և CPS ընկերությունների, որոնք ներկրում են Հայաստան մտնող վառելիքի շուրջ 80 տոկոսը: Մատչելի դիզվառելիքը ձևակերպված է, որպես աջակցություն հողօգտագործողներին, այնինչ հակառակն է, հողօգտագործողներն են օգնում Բարսեղ Բեգլարյանին, նաև որոշ ճարպիկ մեծահարուստների` կամ արագ գումար աշխատել, կամ էլ վաճառելով` դարձյալ գումար աշխատել, ինչպես ասում են` «հոնքն էլ չշարժելով»: