Նիկոլը վճռական է տրամադրված, մեծ լսարան ունեցող գործիչները պիտի նստեն, այդ թվում՝ ես․ Նաիրա Զոհրաբյան

Նիկոլը վճռական է տրամադրված։ Բոլոր, ակտիվ, մեծ լսարան ունեցող գործիչները պիտի նստեն։ Այդ թվում՝ ես։ Այս մասին ֆեյսբուքյան իր էջում գրել է քաղաքական գործիչ Նաիրա Զոհրաբյանը։ 

 

Ինձ նստեցնելը «թալան» օպերացիայի շրջանակում՝ Իլֆ-պետրովյան սատիրա կլինի։

 

Ինձ նստեցնելը երբեւէ ընտրակաշառ բաժանելու իդիոտիզմով, ինչը մի քանի տարի առաջ մտածում էին փորձարկել, դրա վրա անգամ «Օմսկ» սառնարանի սարդելկի ծիծաղը կգա։

 

Եւ ուրեմն՝ ի՞նչ անել։ Ասեմ՝ ինչ են անում։ Երկու օր է ֆեյսբուքի մեսենջեր հավելվածով ինձ գրում են տարբեր իդիոտներ, ովքեր որպես նախաբան երկու լիստ հայհոյում են Նիկոլին, ու հետո անցնում պետպատվերի բուն թեմային։ Իսկ բուն թեման սա է՝ «տիկին Զոհրաբյան, ձեզ մարդիկ վստահում են, լսում են, բաժանեք բոլոր ՔՊ-ականների հեռախոսահամարներն ու տան հասցեները եւ հենց դուք հարթակից կոչ արեք ժողովրդին, որ գնան դրանց տներն ու դրանց հետ հաշվեհարդար տեսնեն»։ 48 ժամվա մեջ առնվազն վեց նման «հուսահատ» առաջարկ եմ ստացել։ Առաջին անգամ մտածեցի՝ էմոցիոնալ քաղաքացի է եւ համբերատար գրեցի, որ մենք Նիկոլ չենք ու նման բան երբեք ու կատեգորիկ չի կարելի անել։ Բայց, երբ մնացած «էմոցիոնալներն» էլ նույն առաջարկով դիմեցին ինձ, հասկացա, որ սրանց խնդիրն իրենց ձեռքում իմ ձայնային կամ տեքստային սքրինն ունենալն է, որտեղ ես կհամաձայնեի հաշվեհարդար տեսնելու ու ՔՊ-ականների տների վրա գրոհելու նրանց առաջարկի հետ։ Դա տեղում կհամարեին բռնություն կազմակերպելու, բռնություն հրահրելու, կամ բռնությանն աջակցելու գործողություն ու ՀՀ Քրեական օրենսգրքով կգային մեր տուն։ Բայց, քանի որ ես կատեգորիկ մերժում եմ անգամ իմ ոխերիմ թշնամու ընտանիքը, երեխաներին, տունը թիրախավորելու, սրանց էս մի պլանը չանցավ։

 

Հետո անցան պլան բ-ին։ Ռուսական համարից գրում է մի կին, ներկայանալով Արցախի համար տառապյալ, եւ խնդրում է իմ տելեգրամի համարը, որպեսզի ինձ ուղարկի ադրբեջանական վայրագությունների կադրեր։ Երբ հրաժարվում եմ տալ իմ օգտահաշիվների համարներն ու տիկնոջը գրում եմ՝ որ իր ձեռքի տակ եղած իմ հայտնի համարին կարող է ուղարկել իր ունեցած նյութերը, որ ես դրանք փոխանցեմ միազգային կառույցներին, տիկինն անհետանում է։ Թե ո՞վ էր, հետո՞ ինչ էին պատրաստվում սարքել՝ հավես չկա անգամ մտածելու։

 

Հիմա, ասածս ի՞նչ է պարոն Աբազյան։ Ես կուտ չեմ ուտում, էլ չեք կարա, էն, իբր, «լափակերի» օպերացիան սարքեք գլխիս, որ ես Սփյուռքի մեր հայրենակիցներին ասել եմ «լափակեր»։ Ձայնային բարդ տեխնոլոգիաների միջոցով էլ հեչ իմաստ չունի ձայն կեղծելն ու իդիոտ դիալոգներ սարքելը, որովհետեւ վերջին դեպքով վառվեցիք։ Էն, ինչ-որ ԱԱԾ բոլոր նախկին պետերը փնտրում էին ու չէին գտնում, գիտեք, որ իմ դեպքում անիմաստ է փող ծախսել ու օրերով հետեւիցս օպերներ կցել։ Ես հարցազրույցներից հետո գնում եմ ուղիղ տուն։ Հա, գիտեք նաեւ, որ անգամ սրճարաններ շատ հազվադեպ եմ գնում։

 

Մնում է հին ու բարի մեթոդը՝ ջեբս պլան գցելը։

 

Եսիմ։ Նավսյակի փորձեք։ Կարող է ինչ-որ մի խումբ իդիոտների համոզեք»: