Վերահսկիչ պալատն այսուհետ դառնալու է Հաշվեքննիչ պալատ

Նոր Սահմանադրությունը ենթադրում է մի շարք օրենքներում փոփոխություններ, որոնցից մեկը Վերահսկիչ պալատի մասին օրենքի փոփոխությունն է:

Սահմանադրության 13-րդ գլուխը արձանագրում է, որ Վերահսկիչ պալատն այսուհետ պետք է լինի Հաշվեքննիչ պալատ, այսինքն՝ աուդիտորական պալատ: Այս մասին այսօր լրագրողների հետ հանդիպման ընթացքում ասաց ԱԺ ֆինանսավարկային և բյուջետային հարցերի մշտական հանձնաժողովի նախագահ Գագիկ Մինասյանը:

«Եթե համեմատելու լինենք Վերահսկիչ պալատի գործառույթները Հաշվեքննիչ պալատի հետ, ապա, ըստ էության, նրանց նպատակները նույնն են՝ հանրային ֆինանսների և հանրային սեփականության արդյունավետ կառավարման տնօրինման խնդիրներն են: Սակայն մի էական փոփոխություն է կատարվել Սահմանադրությամբ, որն էապես փոխելու է այսօրվա Վերահսկիչ պալատի գործունեության հնարավորությունները, Հաշվեքննիչ պալատը չափազանց ավելի անկախ է լինելու, քան այսօրվա Վերահսկիչ պալատը: Խորհրդարանն իր վերահսկողական առաքելությունը մեծ մասով իրականացնում է հաստատելով Վերահսկիչ պալատի գործունեության տարեկան ծրագիրը»,- տեղեկացրեց Գագիկ Մինասյանը:

Պատգամավորը նաև նշեց, որ նոր Սահմանադրությունն էլ ավելի մեծ անկախություն է տալիս Հաշվեքննիչ պալատին, որը հատուկ է Ինտոսայի սկզբունքներին, որոնցից մեկն էլ Հաշվեքննիչ պալատների բացարձակ անկախությունն է: «Այդտեղ ամրագրված է, որ Հաշվեքննիչ պալատն իր գործունեության ծրագիրն ինքնուրույն պետք է հաստատի»,- ասաց պատգամավորը՝ հավելելով. եթե Վերահսկիչ պալատի թիկունքում Ազգային ժողովն էր, ապա Հաշվեքննիչ պալատի թիկունքում օրենքն է:

«Անկախ մարմինը պետք է զերծ մնա քաղաքական բնույթի հայտարարություններից, որպեսզի այս կառույցի նկատմամբ հանրային վստահությունը մեծ լինի: Նրա աշխատանքը պետք է չափազանց թափանցիկ լինի, իր աշխատանքը պետք է վերահսկելի լինի և՛ հասարակության կողմից, և՛ խորհրդարանի կողմից»,-ասաց Գագիկ Մինասյանը:

Նրա խոսքով՝ հաշվեքննիչ մարմինն իր աշխատանքը պետք է ներկայացնի ոչ միայն այնպես, ինչպես այժմ է, այսինքն՝ տարվա ընթացքում ամփոփ, մեկ անգամ, այլ տարվա ընթացքում պարբերաբար պետք է ներկայացնի իր կողմից հաշվեքննման ենթարկված մարմինների հաշվեքննության արդյունքները: Դրանք տարվա ընթացքում 10-15 անգամ պետք է քննարկման առարկա դառնան խորհրդարանում: Խորհրդարանը չի հաստատելու այդ մարմնի գործունեության ծրագիրը: