Արմեն Աշոտյանը «ախտորոշում» տվեց դպրոցներին

ՀՀ հանրակրթական համակարգի թափանցիկության ապահովման նպատակով 2013 թվականից մեկնարկել է հանրակրթական ուսումնական հաստատությունների վարկանիշավորման գործընթացը, որի հերթական արդյունքներն այսօր հրապարակելով ՀՀ կրթության և գիտության նախարար Արմեն Աշոտյանն ասաց, թե խնդիրը չեմպիոնին հայտնաբերելը չէ:

«Իրականում խնդիրը դրված է ախտորոշման մեջ, եղած խնդիրները վեր հանելու մեջ»,- ասաց նախարարը, ապա ներկայացրեց արդյունքները:
Առաջատար եռյակում հետևյալ դպրոցներն են՝ Երևանի «Մխիթար Սեբաստացի» կրթահամալիր հիմնական դպրոցը, Գյումրու Բայրոնի անվան թիվ 20 հիմնական դպրոցը և Երևանի Մ. Մանուշյանի անվան թիվ 48 հիմնական դպրոցը:

«Այս արդյունքները կարևոր են դպրոցների տնօրենների և մանկավարժների համար, որպեսզի կարողանան հասկանալ, թե որտեղ է դպրոցի խնդիրը, որտեղ է առավելությունը: Այն կարևոր է նաև նախարարության համար, որպեսզի խրախուսի լավագույններին: Վարկանիշավորումը թույլ է տալիս գտնելու, թիրախավորելու մեր աջակցության կարիքն ունեցող դպրոցներին»,- ասաց Արմեն Աշոտյանը:

«Կլինեն դժգոհողներ, բայց վարկանիշից դժգոհելուց բացի ես կխնդրեմ իրենց դժգոհել հենց իրենց աշխատանքից, հասկանալ, թե որ ցուցանիշով են հետ ընկել»,-հավելեց նախարարը:
Հիմք ընդունելով ՀՀ հանրակրթական համակարգի կառուցվածքը և համակազմի 2014-2015 ուստարվա վիճակագրական տվյալները՝ դպրոցները բաժանվել են խմբերի հետևյալ չափանիշներով՝

ա)Ըստ կազմակերպաիրավական ձևի և ենթակայության՝ պետական և ոչ պետական
բ. Ըստ աշխարհագրական դիրքի կամ տեղակայման՝ քաղաքային և գյուղական
գ. Ըստ կրթական ծրագրերի աստիճանի՝ տարրական, հիմնական, միջնակարգ և ավագ, վարժարան
դ.ըստ սովորողների թվի՝ մեծ, միջին և փոքր:

ՀՀ-ում պետական տարրական և ոչ պետական հիմնական դպրոցների վարկանիշավորում չի կատարվի դրանց սակավաթվության պատճառով: