Անդրանիկ Թևանյանը պատրաստ է օգնել Հայկ Մարությանին դառնալ քաղաքապետ, բայց պայմանով

Որպես այդպիսին` ուղղակի բանակցություններ չկան, մենք տեսել ենք հանրային հնչեցրած տեսակետները: Այս մասին այսօր լրագրողների հետ զրույցում ասաց «Մայր Հայաստան» դաշինքի առաջնորդ Անդրանիկ Թևանյանը` պատասխանալով հարցին, թե «Հանրային Ձայն» և «Ազգային առաջընթաց» կուսակցությունների հետ քննարկումներ ունեցե՞լ է և դեմ չէ՞, որ Հայկ Մարությանը լինի Երևանի քաղաքապետի թեկնածու:

«Մենք պատրաստ ենք քննարկել համագործակցության բոլոր տիպի ձևաչափերը` այն պարագայում, երբ որ տվյալ դեպքում ուժը կիսում է մեր մոտեցումներն ամբողջական իշխանափոխության ծրագրի մասով: Ես հայտարարել եմ, մինչև ընտրությունները, որ հրաժարվում եմ ԱԺ պատգամավորի մանդատից և ես չեմ գնում Երևանի ավագանու մանդատ ստանալու ճանապարհով, ինձ համար նույնիսկ քաղաքապետ դառնալը խնդիրը չէ, այլ մենք գնում ենք իշխանափոխության ճանապարհով, որպեսզի ապահովենք Հայաստանի և Արցախի անվտանգությունը, որովհետև իշխանափոխությունը համարում ենք կարևոր նախապայման: Մեզ սարսափելի պրոցեսներ են սպասվում այս իշխանության մնալու պարագայում, և մեզ համար գերխնդիրը Հայաստանի անվտանգային օրակարգը սպասարկելն է»,- ասաց Թևանյանը:

Նա անդրադարձավ նաև «Ազգային առաջընթաց» կուսակցության առաջադրած թեկնածու Հայկ Մարությանի հետ հնարավոր համագործակցությանը:

«Կոնկրետ Հայկ Մարությանի մասով` եթե վերցնենք այն տոկոսները, որ իրենք հավաքել են, ոչ իշխանական դաշտից, ապա մենք հետևյալ սկզբունքով ենք առաջնորդվում, որ մենք կարող ենք օգնել, որպեսզի ինքը համապատասխան ձայներ հավաքի և դա կանենք այն դեպքում, երբ պարզվի, որ ինքը կիսում է մեր օրակարգը ամբողջական իշխանափոխության մասով: Ի սկզբանե հայտարարում ենք, որ որևէ պաշտոնի չենք հավականում, եթե այդ համագործակցությունը տեղի ունենա, մենք չենք հավակնում որևէ պաշտոնի կամ վերահսկողական լծակի: Այսինքն` մենք պատրաստ ենք համագործակցության այն տրամանաբանությամբ, որ մեր տեսակետները կիսում են ամբողջական իշխանափոխության մասով: Եթե Հայկ Մարությունն ուզում է դառնալ քաղաքապետ, մենք կարող ենք օգնել, այդ հնարավորությունը տալ իրեն, բայց ամբողջական իշխանափոխության մեր ծրագրի կիսելու պայմաններում»: