Զուգարանի թղթերը փողոցում «լող են տալիս»․ բնակիչներն ահազանգում են՝ կոյուղաջրերը լցվում են թիվ 135 դպրոցի բակ (լուսանկարներ, տեսանյութ)

NEWSPRESS.am-ն այսօր՝ սեպտեմբերի 16-ին, հերթական ահազանգն է ստացել Երևան քաղաքի բնակիչներից։

Նոր Նորքի 2-րդ զանգվածի մի խումբ բնակիչների հերթական ահազանգը կրկին Վեոլիա ջուր ընկերության փնթի աշխատանքի մասին է։ 

Բանն այն է, որ Նոր Նորքի 2-րդ զանգվածում, Նելսոն Ստեփանյան 6 հասցեում,  135 դպրոցի դիմաց մեկ շաբաթից ավելի է, ինչ ո՛չ ավել, ո՛չ պակաս կոյուղաջուր է լցվում։ 

«Գարշահոտությանն այլևս դիմանալ չի լինում, մեկ շաբաթից ավելի է՝ տարածքով անցնել չի լինում, նույնիսկ զուգարանի թղթերն ենք տեսնում փողոցում «լող տալիս»։ Բայց սարսափելին դա չէ, այլ այն, որ երեխաներն են ստիպված լինում անցնել այդտեղով»,- ասաց մեր զրուցակիցներից մեկը, որն իր երեխային նշված դպրոց է տանում։ Նա հավելեց, որ երեխաները դժգոհում են՝ դասի ժամանակ չեն կարողանում նույնիսկ պատուհան բացել՝ հոտը խեղդում է։ 

Մեկ այլ բնակիչ էլ հայտնեց, որ դիմել է Երևանի քաղաքապետարան, որտեղից իրենց ասել են, որ խնդիրն իրենց լիազորությունների տիրույթում չէ։ 

«Ջուրը Թոթովենցի փողոցով գնում, լցվում է նաև Գայի պողոտա, մինչդեռ ոչ ոք կարծես այս խնդիրը չի տեսնում»,- գանգատվեց մեր երրորդ զրուցակիցը։ 

Փաստացի, սա արդեն երրորդ նման ահազանգն է, որ ստանում է NEWSPRESS.am-ը, երբ խողովակները պայթում են, ու ջուրը լցվում է փողոցները՝ անհարմարություն պատճառելով մեր համաքաղաքացիներին։ Ստացվում է, որ վերջին շաբաթներին այս խնդիրը, կարելի է ասել, համակարգային է դարձել, իսկ պատկան մարմինները չկան ու չկան։ 

Լուսանկարները և տեսանյութը NEWSPRESS.am-ին տրամադրել են բնակիչները