Ավետիսյանների գործով դատավարության վկայի ցուցմունքում անհամապատասխանություններ կան

Գումրիում տեղակայված 102-րդ ռազմաբազայի տարածքում շարունակում է Ավետիսյանների սպանության գործով վկաների հարցաքննությունը:
Հարցաքննության հրավիրված Գյումրիում տեղակայված 102-րդ ռազմաբազայի սահմանապահ ջոկատի աշխատակից, սպա Միխայիլ Խաչատրյանը պատմեց, որ ճանաչում է գործով ամբաստանյալ Վ. Պերմյակովին:

Նրա խոսքով հունվարի 12-ի լույս 13-ի ի գիշերը զորամասի հրամանատարությունը հրաման է արձակել, որպեսզի շտապ մեկնի ծառայության, քանի որ պահակակետից զինծառայող է փախել: Եկել է զորամաս ու ավագ սերժանտի հետ խստացված ռեժիմով աշխատանքի անցել: Հատուկ վարժեցված շան հետ ինքն ու ավագ սերժանտը մեկնել են Մյասնիկյան 188 տուն, ուսումնասիրել տարածքը, մոտ 200 մետր գնացել ու կորցրել հետքը, դեպքի վայրում տեսել են նաեւ քաղաքացիական հագուստով երկու անձանց, ենթադրել են, որ ՀՀ ոստիկանությունից են:

«Երբ եկանք ծառայության վայրը, տեսանք պոմպային մասում լապտերի լույսը: Նկատեցի, որ ինչ-որ մեկը լապտերի լույս է գցել: Թույլ տվեցինք, որ անծանոթը մոտենա: Երբ կանչեցինք` անծանոթը պատասխանեց՝ ձերոնցից եմ: Հրաման արձակեցի կանգնել, ինքը շարունակում էր շարժվել: Ես նախազգուշական կրակոց արձակեցի, դրանից հետո անծանոթը կանգ առավ: Ես հրամայեցի պառկել գետնին… ժամանեց օպերատիվ խումբը»,- պատմեց Միխայիլ Խաչատրյանը:

Տուժողի իրավահաջորդի ներկայացուցիչը վկայի՝ դատարանում տված ցուցմունքի ու նախաքննական ցուցմունքի միջեւ նկատեց անհամապատասխանություն:

Դատարանում փաստաբանի հարցին, թե ինչու մինչեւ որոնողական աշխատանքներն սկսել հայկական կողմին չեն տեղեկացրել, ինչպես դա նախատեսվում է հայ-ռուսական միջպետական պայմանագրով, վկա Միխայիլ Խաչատրյանը պատասխանել էր, որ ժամանակ չկորցնելու համար են դա արել։

Հիշեցնենք, որ ռուսական կողմը ՀՀ իրավապահներին կատարվածի մասին տեղեկացրել է միայն այն ժամանակ, երբ Պերմյակովին շների օգնությամբ փնտրելիս անհրաժեշտ է եղել խուզարկել գյումրեցիների տները։

Վկաների հարցաքննությունը շարունակվում է: