Լինի դրա անունը կոալիցիա, Վարդուշ, թե Հայկուշ՝ ԲՀԿ-ն համագործակցության չի գնալու

ԲՀԿ-ն փակել է կոալիցիայի թեման: Այս մասին լրագրողների հետ զրույցում հայտարարեց ԲՀԿ խմբակցության ղեկավար Նաիրա Զոհրաբյանը:
Նա չի հերքում, որ կուսակցությունում կան տարաձայնություններ ու որոշակի լարվածություն: Կուսակիցներից շատերը ցանկանում են մտնել կոալիցիա և համոզված են, որ դա կլինի արդյունավետ համագործակցություն, սակայն Զոհրաբյանը, իր գործընկերներից շատերի հետ այդ տեսակետը չի կիսում:

«ԲՀԿ-ն մինչև խորհրդարանական ընտրությունները որևէ ֆորմատով՝ լինի դրա անունը կոալիցիա, Վարդուշ, Հայկուշ, չի գնալու: ԲՀԿ-ն պատրաստվում է 2017թ.-ի խորհրդարանական ընտրություններին»,- ասաց Զոհրաբյանը:
Նկատենք, որ ԲՀԿ խմբակցության ղեկավարը, ճեպազրույցի էր եկել խմբակցության անդամներ Միքայել Մելքումյանի, Վահան Բաբայանի և Վահե Էնֆիաջյանի հետ:

Այսօր առավոտյան մամուլում տեղ գտած հոդվածում, ըստ որի ԲՀԿ-ականները ցանկանում են պաշտոնանկ անել Զոհրաբյանին, նշված էին հենց այս պատգամավորների անունները:

Մատնանշելով նրանց ներկայությունը՝ Նաիրա Զոհրաբյանը ընդգծեց, թե իրականությանը չեն համապատասխանում մամուլում գրված լուրեր:

«Այստեղ նստած են իմ գործընկերները, որոնց անունը շոշափվում էր այդ կոնտեքստում, թե իբր նրանք պատրաստվում են ինձ պաշտոնանկ անելու նախաձեռնությամբ հանդես գալ: Ինքս լրագրող եմ եղել, հասկանում եմ, որ ընթերցվում են նյութերը, որտեղ գույները խտացված են, բայց ԲՀԿ-ում նման խնդիրներ չկան: ԲՀԿ-ն ազատ մտածող կուսակցություն է, մեզ մոտ յուրաքանչյուր հարցի վերաբերյալ ամեն մեկը կարող է իր տեսակետն ունենալ ու ամենևին պարտադիր չէ, որ բոլորիս տեսակետը համընկնի»,- նկատեց պատգամավորը: