Պաշտոնանկությունների շքերթ. աշխատանքից ազատվողների նոր անուններ. «Ժողովուրդ»

«Ժողովուրդ» օրաթերթը գրում է.

«Հայրենի գործադիրում լարված և անհանգիստ իրավիճակ է: Նիկոլ Փաշինյանը դժգոհ է նախարարներից, և առաջիկայում մեծ թվով պաշտոնանկություններ են սպասվում կառավարությունում:

«Ժողովուրդ» օրաթերթը գրել էր, որ թիրախում ՏԿԵ նախարար Գնել Սանոսյանը, արդարադատության նախարար Գրիգոր Մինասյանը և շրջակա միջավայրի նախարար Հակոբ Սիմիդյանն են, որոնք Երևանի ավագանու ընտրություններից հետո հրաժեշտ կտան իրենց պաշտոններին:

Ըստ գործադիրում շրջանառվող տեղեկությունների՝ Նիկոլ Փաշինյանը, սակայն, այսքանով չի սահմանափակվելու. նախատեսվում է, որ իրենց պաշտոններին հրաժեշտ են տալու նաև ԲՏԱ նախարար Ռոբերտ Խաչատրյանը և աշխատանքի և սոցիալական հարցերի նախարար Նարեկ Մկրտչյանը:

Ահա, այս պաշտոնանկությունների մասին թեժ խոսակցություններով պայմանավորված, կառավարությունում իրավիճակը շատ լարված է, նախարարները շունչները պահած սպասում են, թե ով է Փաշինյանի հաջորդ թիրախը, ով է հրաժեշտ տալու իր պաշտոնին: Նիկոլ Փաշինյանը, սակայն, դեռ չի շտապում. սպասում է, որ ավագանու ընտրությունները անցկացնեն, դրանից հետո նոր միայն սկսի «չիստկան» կառավարությունում:

Բացի սա, դեռ պաշտոնանկ արվող նախարարներին փոխարինողների հարցը լուծված չէ. գաղտնիք չէ, որ Փաշինյանը հիմա գրեթե իր բոլոր թիմակիցների հետ լարված է, ոչ մեկին չի վստահում, դրա համար էլ փոխարինող չի գտնում առաջիկայում պաշտոնանկ արվող նախարարներին»:

Առավել մանրամասն թերթի այսօրվա համարում