Կառուցվածքային փոփոխություններ՝ ՊԵԿ-ում

Վարչապետ Նիկոլ Փաշինյանը սեպտեմբերի 5-ին որոշում է ստորագրել, որով Պետական եկամուտների կոմիտեի կառուցվածքում կատարվել են մի շարք կառուցվածքային փոփոխություններ․

«1. Հայաստանի Հանրապետության վարչապետի 2018 թվականի հունիսի 11-ի «Հայաստանի Հանրապետության պետական եկամուտների կոմիտեի կանոնադրությունը հաստատելու մասին» N 702-Լ որոշմամբ (այսուհետ` որոշում) հաստատված Պետական եկամուտների կոմիտեի կառուցվածքում կատարել հետևյալ կառուցվածքային փոփոխությունները՝

1) Մաքսային հսկողության վարչությունից, Արևելյան, Հարավային և Հյուսիսային մաքսատուն-վարչություններից առանձնացման եղանակով ստեղծել Արտաքին տնտեսական գործունեության մաքսային սպասարկման և հսկողության
վարչություն.

2) Երևանի մաքսային սպասարկման կենտրոն-մաքսատուն վարչությունը միացնել Արտաքին տնտեսական գործունեության մաքսային սպասարկման և հսկողության վարչությանը.

3) Մաքսային հսկողության վարչությունից, Հյուսիսային մաքսատուն-վարչությունից առանձնացման եղանակով ստեղծել Պետական սահմանի ցամաքային անցման կետերում մաքսային սպասարկման և հսկողության վարչություն.

4) Հարավային և Արևելյան մաքսատուն-վարչությունները միացնել Պետական սահմանի ցամաքային անցման կետերում մաքսային սպասարկման և հսկողության վարչությանը.

5) Հյուսիսային մաքսատուն-վարչությունը միացնել Արևմտյան մաքսատունվարչությանը և այդ կապակցությամբ Արևմտյան մաքսատուն-վարչությունն անվանափոխել Էլեկտրոնային առևտրի և օդային տրանսպորտով իրականացվող փոխադրումների վարչության.

6) Մաքսային հսկողության վարչությունը միացնել Հետբացթողումային հսկողության վարչությանը և այդ կապակցությամբ Հետբացթողումային հսկողության վարչությունն անվանափոխել Հետբացթողումային հսկողության և ստուգումների վարչության:

2. Որոշմամբ հաստատված հավելվածում կատարել հետևյալ լրացումները և փոփոխությունները՝
1) հավելվածի 28-րդ կետում`
ա. 10-րդ, 19-21-րդ և 23-րդ ենթակետերն ուժը կորցրած ճանաչել,
բ. 11-րդ ենթակետում «Հետբացթողումային հսկողության» բառերը փոխարինել «Հետբացթողումային հսկողության և ստուգումների» բառերով,

գ. 22-րդ ենթակետում «Արևմտյան մաքսատուն-վարչություն» բառերը փոխարինել «Էլեկտրոնային առևտրի և օդային տրանսպորտով իրականացվող փոխադրումների վարչություն» բառերով, դ. լրացնել հետևյալ բովանդակությամբ նոր՝ 25-26-րդ ենթակետերով. «25) Արտաքին տնտեսական գործունեության մաքսային սպասարկման և հսկողության վարչություն.

26) Պետական սահմանի ցամաքային անցման կետերում մաքսային սպասարկման և հսկողության վարչություն.»:

3. Սույն որոշումն ուժի մեջ է մտնում հրապարակմանը հաջորդող տասներորդ օրը։

4. Սույն որոշման 1-ին կետով նախատեսված կառուցվածքային փոփոխության ենթարկվող կառուցվածքային ստորաբաժանումների գործունեությունը համարվում է դադարեցված սույն որոշման 1-ին կետով ստեղծվող վարչությունների հաստիքների առնվազն 50% համալրելուն հաջորդող օրվանից»։