Ես ուրախ եմ, որ Արայիկ Հարությունյանն էլ չկա. Ինքը Արցախը հանձնելու Նիկոլի գործիքն էր. Աննա Մկրտչյան

Վերջին երեք տարիների ընթացքում ամենալավ նորությունն այն էր, որ այս տարի Արցախի օրը Արցախի տոնը նշելու ենք դավաճաններից մեկի հեռացման պայմաններում: Այս մասին այսօր՝ սեպտեմբերի 2-ին, Ազատության հրապարակում լրագրողների հետ զրույցում նշեց «Պատիվ ունեմ» խմբակցության պատգամավոր Աննա Մկրտչյանը:

«Այն պաշտոնյան, որ Արցախում վեր էր ընկել այդ աթոռին եւ ամեն կերպ փորձում էր չպոկվել այդ աթոռից, որ շարունակի կատարել Նիկոլ Փաշինյանի հրամանները, հլու-հնազանդ ավարտին հասցնել Արցախի հանձնումը, այսօր արդեն այդ իրականության մասը չէ: Ես շատ ուրախ եմ, շատ հուսադրված եմ, որ Արցախում Նիկոլի գործիքը էլ չկա: Այդ պայքարը նաեւ շարունակական կլինի եւ հայկական պետականությունների վերագործարկման համար հիմք կհանդիսանա: Ինձ մնում է հույս հայտնել, որ Հայաստանում էլ մեզ կազմալուծող ցանկացածների օղակը շատ շուտով կմեկուսացվի եւ մենք կբռնենք վերականգնման ճանապարհը»,-ասաց նա:

Աննա Մկրտչյանը նկատեց, որ այն պահին, երբ ընդդիմությունը փորձում է կոնսոլիդացնել հասարակությանը եւ իրականացնել ինչ-որ գործողություններ, այդ պահին Նիկոլ Փաշինյանը զանգում է Ալիեւին, ասում է՝ պետք է սահմանային լարվածություն լինի. «Մեզ անընդհատ ուզում են համոզել, որ սա է իրականությունը. Եթե Ալիեւը, թուրքը որոշում է, որ այսօր հազար հայ պետք է սպանի, ուրեմն եկեք այդ հազարը սպանի, որ էն երկու հազարը կարողանան ապրել: Բնականաբար, սրան ընդդիմացողներին պետք է թիրախավորեն, Նիկոլի դավաճանության մասին խոսացողներին պետք է կալանավորեն»,-ասաց ընդդիմադիր պատգամավորը: