Շարմազանովը հիասթափեցրեց լրագրողներին

ՀՀԿ-ն այսօր՝ փետրվարի 4-ին, մոտ 2 ժամ տևած Գործադիր մարմնի նիստից հետո,  ՀՀԿ մամուլի խոսնակ Էդուարդ Շարմազանովը հայտարարեց, որ կոալիցիայի հետ կապված հարց չի քննարկել։

Նա ևս մեկ անգամ կրկնեց, որ թե ՀՀԿ-ի, թե ՀՅԴ-ի համար համագործակցության հիմքը ոչ թե պաշտոնների բաժանումն է, այլ գաղափարախոսությունը, ծրագրային դրույթները:

«Պետք է ձեզ հիասթափեցնեմ. գիտեմ, թե հատկապես ինչ եք սպասում դուք` լրագրողներդ: Կարծում եմ, որ մինչև մյուս շաբաթվա ավարտ կունենանք որոշում: Այս պահին քննարկումները շարունակվում են»,- ասաց Շարմազանովը:

Դիտարկմանը` թե ինչու են ձգձգվում Դաշնակցության հետ  կոալիցիայի շուրջ բանակցությունները` Շարմազանովը  պատասխանեց. «Ի՞նչն է ձգձգվում: Իսկ ո՞վ է սահմանել կոնկրետ ժամկետ, դու՞ք: Դուք գրում եք, դուք հերքում եք, եւ հետո ասում եթ, թե ձգձգվում է: Մենք կոնկրետ ժամկետ չեն նշել»:

Շարմազանովի խոսքով՝ իրենք այսօր քննարկել են նոր Ընտրական օրենսգիրքը։